فتوی نمبر : 10813
انشورنس پالیسیاں لینے کاحکم

انشورنس پالیسیاں لینے کاحکم

مجھے انشورنس کی نوکری کی کمائی کے بارے میں پوچھنا ہے کہ یہ حلال ہوگی یا حرام؟ اگر کسی کا ایکسیڈنٹ ہو گیا ہو، اور اس کو معاوضہ کے طور پر انشورنس کمپنی سے کچھ پیسے ملے ہوں ،اور وہ فوراً نوکری کے قابل نہ ہو ، ایسے میں وہ پیسے جو اس کو انشورنس کمپنی کی طرف سے ملے ہوں ،کیا حلال وجائز ہوں گے ؟ اور کیا وہ ایسے پیسوں کو اپنے کھانے پینے کیلئے اور مذہبی کاموں کیلئے استعمال کر سکتا ہے ،جیسے صدقہ یا مسجد کیلئے ؟ برائے مہربانی تفصیل سے جواب دیں۔

الجوابُ حامِدا ًو مُصلیِّا ً

مروّجہ انشورنس پالیسیاں عموماً ربا و قمار پر مشتمل ہوتی ہیں، ان سے منافع لینا تو جائز نہیں ، البتہ پالیسی ہولڈر معاوضہ میں ملی ہوئی رقم میں سے اتنی رقم استعمال کر سکتا ہے، جو اُس نے پالیسی لینے میں یا بصورت پریمیم جمع کی ہو ،اور اس سے زائد رقم کو اپنے استعمال میں لانا جائز نہیں، بلکہ بغیر ثواب کی نیت کے کسی مستحقِ زکوٰۃ کو صدقہ کرنا ضروری ہے۔

مأخَذُ الفَتوی

کما قال الله تعالى: ﴿وَأَحَلَّ اللَّهُ الْبَيْعَ وَحَرَّمَ الرِّبَا﴾ (البقرة: 275) ۔
وقال الله تعالى أیضاً: ﴿وَإِنْ تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَ﴾ (البقرة: 279)۔
كما قال الله تعالیٰ: ﴿يٰا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوه لَعَلَّكُمْ تُفْلِحُونَ (المائدة 90)۔