فتوی نمبر : 34410
سلیپنگ پارٹنر (جس کا کاروبار چلانے سے کوئی تعلق نہ ہو) کے لئے اسکے سرمایہ سے زیادہ نفع مقررکرنے کاحکم

سلیپنگ پارٹنر (جس کا کاروبار چلانے سے کوئی تعلق نہ ہو) کے لئے اسکے سرمایہ سے زیادہ نفع مقررکرنے کاحکم

سوال یہ ہے کہ اگر دو شریک ہوں، ایک کا حصہ 70 فیصد ہو، اور دوسرے کا 30 فیصد ہو، ان میں سے اگر کم فیصد والا بزنس چلا رہا ہو ،اور زیادہ فیصد والا بزنس دیکھ بھی نہیں (کہ وہ بزنس حلال ہے یا حرام) رہا ہو تو اگر زیادہ حصے والا منافع لے تو جائز ہے ؟مثال کے طور پر علی ، با بر دو شریک ہیں ایک کا حصہ 7000 ہے ،اور بابر کا 3000 ہے، کل 10,000 بن گئے ،تو ایسی صورت میں اگر بابر بزنس چلا رہا ہو، اور علی کو 70 فیصد کے حساب سے نفع دے رہا ہو رہا ہو، اگر چہ علی نے بزنس دیکھا بھی نہ ہو تو علی کے لئے یہ نفع لینا جائز ہے؟

الجوابُ حامِدا ًو مُصلیِّا ً

واضح ہو کہ بطورِ شرکت کا روبار کرتے ہوئے پارٹنر زباہمی رضامندی سے منافع کی تقسیم کے لئے کوئی بھی فیصدی تناسب مقرر کر سکتے ہیں، مگر سلیپنگ پارٹنر (جس کا کاروبار چلانے سے کوئی تعلق نہ ہو) کے لئے اس کے سرمایہ سے زیادہ نفع مقرر نہ کیا جائے - لہذا صورتِ مسئولہ میں سلیپنگ پارٹنر مسمیٰ علی کے لئے اگر اس کے سرمایہ کے تناسب سے منافع میں سے ستر فیصد (70) حصہ سے مقرر کیا گیا ہو تو یہ شرعاً جائز اور درست ہے ،البتہ ستر فیصد سے زیادہ منافع ان کے لئے طے کرنا درست نہیں، جس سے احتراز لازم ہے ۔

مأخَذُ الفَتوی

کما في بدائع الصنائع: إذا شرطا الربح على قدر المالين متساويا أو متفاضلا فلا شك أنه يجوز ويكون الربح بينهما على الشرط سواء شرطا العمل عليهما أو على أحدهما اھ (6/ 62)۔
وفي الفتاوى الهندية: وأن يكون الربح جزءا شائعا في الجملة لا معينا فإن عينا عشرة أو مائة أو نحو ذلك كانت الشركة فاسدة كذا في البدائع (2/ 302)۔
وفي شرح المجلة: (اذا شرط الشريكان تقسيم الربح بينهما على مقدار رأس المال سواء كان المال متساوياً أو متفاضلا يكون صحيحاً ويقسم الربح بينهما على قدر رأس المال كما شرطا سواء شرط عمل الاثنين أو شرط عمل الواحد وحده إلا أنه إذا شرط عمل الواحد وحده يكون رأس مال الأخر في يده بضاعة) فلذلك الاخر ربح ماله وعليه وضيعته الخ (۴/ ۲۹۴) -