فتوی نمبر : 69801
عمرہ کے ثواب کا انکار کرنا

عمرہ کے ثواب کا انکار کرنا

السلام علیکم !
ہم لوگوں نے رمضان 2023 میں عمرہ کیا تھا ، ایک قاری صاحب کہتے ہیں کہ عمرہ کا ثواب نہیں ملتا ، حج کا ثواب ہے ، عمرہ تو ایسا ہی ہے ، اگر ہمت ہے تو حج کریں ، آپ وضاحت فرمادیں کہ کیا عمرہ کا ثواب نہیں ملتا ۔

الجوابُ حامِدا ًو مُصلیِّا ً

واضح ہو کہ عمرہ اگرچہ نفلی عبادت ہے ، لیکن یہ بھی حج کی طرح گناہوں کی معافی اور نیکیوں کو جمع کرنے کا بڑا ذریعہ ہے ، اور بہت ساری روایاتِ مبارکہ میں عمرہ کی فضیلت وارد ہوئی ہیں ، بالخصوص رمضان المبارک میں عمرہ کی ادائیگی کی مزید تاکید اور فضیلت احادیثِ مبارکہ میں ملتی ہے ، چنانچہ حضرت عبداللہ بن عباس رضی اللہ عنہ فرماتے ہیں کہ نبی کریم ﷺ نے ایک انصاری صحابیہ سے ارشاد فرمایا : "جب ماہِ رمضان آئے تو اس میں عمرہ کرلینا ، کیونکہ رمضان میں عمرہ کرنا حج کے برابر ہے " ، ایک اور روایت میں آتاہے کہ نبیِ کریم ﷺ نے امِ سنان نامی ایک انصاری صحابیہ کو ارشاد فرمایا " رمضان المبارک میں عمرہ کرنا حج کرنے یا میرے ساتھ حج کرنے کے برابر ہے" ، لہٰذا قاری صاحب کا مذکورہ قول احکامِ شرعیہ سے ناواقفیت پر مبنی ہے ، اس لئے اس طرح کی غیر مستند باتیں دین کی طرف منسوب کرکے لوگوں میں پھیلا کر ان میں انتشار کا باعث بننا درست نہیں ، جس سے احتراز لازم ہے ، تاہم حج فرض ہونے کی صورت میں فقط عمرہ کی ادائیگی سے فریضۂ ِحج ساقط نہ ہوگا ، بلکہ اس کی ادائیگی لازم ہوگی ۔

مأخَذُ الفَتوی

کما فی صحیح البخاری : عن أبي هريرة رضي الله عنه : أن رسول الله صلى الله عليه و سلم قال : العمرة إلى العمرة كفارة لما بينهما و الحج المبرور ليس له جزاء إلا الجنة ( ج 1 ، ص 238 ، باب وجوب العمرۃ و فضلھا ، ط ؛ قدیمی ) ۔
و فیہ ایضاً عن عطاء قال : سمعت ابن عباس رضي الله عنهما يخبرنا يقول : قال رسول الله صلى الله عليه و سلم لامرأة من الأنصار - سماها ابن عباس فنسيت اسمها -ما منعك أن تحجين معنا ، قالت : كان لنا ناضح فركبه أبو فلان و ابنه لزوجها و ابنها و ترك ناضحا ننضح عليه ، قال : فإذا كان رمضان اعتمري فيه ، فإن عمرة في رمضان حجة أو نحوا مما قال ۔ ( ج 1 ، ص 239 ، ابواب العمرۃ ، باب عمرۃ فی رمضان ) ۔
و فی صحیح مسلم : عن ابن عباس أن النبي صلى الله عليه و سلم قال : لامرأة من الأنصار يقال لها أم سنان ما منعك أن تكوني حججت معنا قالت : ناضحان كانا لأبي فلان - زوجها - حج هو و ابنه على أحدهما و كان الآخر يسقي عليه غلامنا ، قال : فعمرة في رمضان تقضي حجة أو حجة معي ( ج 2 ، ص 829 ، باب فضل العمرۃ فی رمضان ، ط : البشریٰ )-