حضراتِ حسن وحسین کے ناموں کے ساتھ علیہ السلام لگانے کا حکم

محترم جناب مفتی صاحب جامعہ بنوریہ عالمیہ سائٹ ایریا کراچی
السلام علیکم ورحمۃ اللہ وبرکاتہ! امید ہے آپ بخیریت ہوں گے ؟ اس خط کے ذریعے درج ذیل سوال کا جواب مطلوب ہے، براہ مہربانی تفصیلی جواب سے مستفیض فرمائیں ؟
کیا حضرت محمد صلی اللہ علیہ وسلم کے نواسوں حضرت حسن اور حضرت حسین کے ناموں کے ساتھ علیہ السلام / علیہم السلام لکھنا درست ہے ؟ راقم کی معلومات کے مطابق فقہ جعفریہ میں دونوں صحابہ کرام کے نام کے ساتھ" علیہ السلام" لکھا جاتا ہے، جبکہ فقہ حنفیہ میں دونوں صحابہ کرام کے ناموں کے ساتھ ”رضی اللہ عنہ “ لکھا جاتا ہے ؟ اس ضمن میں آپ کا فتویٰ درکار ہے ؟

الجوابُ حامِدا ًو مُصلیِّا ً

" علیہ السلام " يا عليهم السلام " ایک دعائیہ جملہ ہے، جس کے معنی ہیں کہ اس پر سلامتی ہو، معنوی اعتبار سے اس جملہ کا استعمال ہر مسلمان کے لیے کیا جا سکتا ہے ، بلکہ ہر مسلمان دوسرے سے ملاقات کے وقت السلام علیکم کہہ کر وقتاً فوقتاً یہ دعائیہ جملے استعمال کرتا ہے اور کتب حدیث میں بھی بعض مقامات پر غیر نبی کے لیے " علیہ السلام" یا "سلام اللہ علیہ" کے الفاظ استعمال ہوئے ہیں، مگر عرفاً شخصیات میں سے انبیاء کرام علیہم الصلوات والتسلیمات کے ساتھ اس جملے کا استعمال خاص ہو چکا ہے، اور عوام اس سے نبی اور غیر نبی کے درمیان پہچان کرتے ہیں، چنانچہ اہل سنت والجماعت حضرت علی اور حضرات حسنین سمیت تمام صحابہ کرام کے لیے " رضی اللہ عنہ " کا دعائیہ جملہ جو قرآن کریم میں اللہ تعالی نے ان کے لیے استعمال فرمایا ہے، استعمال کرنے کو کہتے ہیں ، لہذا حضرت حسن اور حضرت حسین رضی اللہ عنہما کے ناموں کے لیے " علیہ السلام " یا " علیهم السلام " کے بجائے ، رضی اللہ تعالی عنہ کا دعائیہ جملے استعمال کرنے کا اہتمام کرنا چاہیئے ، تاکہ کسی قسم کا اشتباہ یا مشابہت کا شائبہ نہ ہو ۔

مأخَذُ الفَتوی

كما في الدر المختار: قال وكذا لا يصلي أحد على أحد إلا على النبي - صلى الله عليه وسلم -. (6/ 396)
و في حاشية ابن عابدين (رد المحتار): (قوله وكذا لا يصلي أحد على أحد) أي استقلالا أما تبعا كقوله: اللهم صل على محمد وعلى آله وأصحابه جاز خانية، والمراد غير الملائكة، أما هم فيجوز عليهم استقلالا قال في الغرائب: والسلام يجزي عن الصلاة على النبي - صلى الله عليه وسلم - ط و في خطبة شرح البيري: فمن صلى على غيرهم أثم ويكره وهو الصحيح. (6/ 396، 397) والله اعلم بالصواب