ہندو کو قرآن پڑھانے اور اس کے ہاتھ میں قرآن دینے کا حکم

کیا فرماتے ہیں مفتیانِ کرام درجِ ذیل مسائل کے بارے میں کہ:
(1)۔ایک ہندو کہتا ہے کہ مجھے قرآن پڑھاؤ ، لیکن مسلمان نہیں ہونگا ، تو اس کا قرآن پڑھنا اورہاتھ لگانا کیسا ہے؟
(2)۔ برسی اور چالیسویں کا کھانا کیسا ہے؟ بعض حضرات کا کہنا ہے کہ یہ دونوں اللہ کے نام پر کی جاتی ہیں ، صرف تاریخ کا تقرر ہوتا ہے ، ان کے کھانے میں کوئی مضائقہ نہیں، نیز گیارہویں شریف کا کیا حکم ہے؟ براہِ کرم ان مسائل کا شریعتِ اسلامی کی رو سے وضاحت فرما کر ممنون فرمائیں۔

الجوابُ حامِدا ًو مُصلیِّا ً

(1)۔ اگر اس کے جسم پر کوئی ظاہری نجاست نہ لگی ہو اور محض سیکھنا چاہے تو اس نیت سے کہ ہوسکتا ہے کہ وہ اسے پڑھ کر ہدایت و رہنمائی حاصل کرلے ، اس کو پڑھانا بلاشبہ جائز اور درست ہے۔
(2)۔مذکورہ تاریخوں کا اہتمام بدعتِ محض ہے ، شریعت میں اس قسم کی کوئی تخصیص و تعیین نہیں ، جب چاہے کیا جاسکتا ہے ، جبکہ گیارہویں کا کھانا ، اگر غیر اللہ کی نذر نہ ہو ، بلکہ اللہ تعالیٰ کے نام پر اور متعلقہ بزرگوں کے محض ایصالِ ثواب کی خاطر تیار کیا گیا ہو ،تو وہ بلاشبہ حلال ہے ، ورنہ نہیں۔

مأخَذُ الفَتوی

فی الدر : و يمنع النصراني من مسه ، و جوزه محمد إذا اغتسل و لا بأس بتعليمه القرآن و الفقه عسى یھتدی و تحته فی الشامية و فی بعض النسخ الکافر اھ(1/ 177)۔
قال اللہ تعالی : {حُرِّمَتْ عَلَيْكُمُ الْمَيْتَةُ وَ الدَّمُ وَ لَحْمُ الْخِنْزِيرِ وَ مَا أُهِلَّ لِغَيْرِ اللَّهِ بِهِ } [المائدة: 3]۔
و فی سنن الترمذي : حدثنا قتيبة بن سعيد أنبأنا حماد بن زيد عن مجالد عن الشعبي عن النعمان بن بشير قال : سمعت رسول الله صلى الله عليه و سلم يقول الحلال بين و الحرام بين و بين ذلك أمور مشتبهات لا يدري كثير من الناس أمن الحلال هي أم من الحرام فمن تركها استبراء لدينه و عرضه فقد سلم و من واقع شيئا منها يوشك أن يواقع الحرام كما أنه من يرعى حول الحمى يوشك أن يواقعه ألا و إن لكل ملك حمى ألا و إن حمي الله محارم اھ(3/ 511)۔