وہم کی وجہ سے وضو کے بجائے تیمم کرنا

میں بہت حساس اور وہمی طبعیت کا مالک ہوں، جب سے پانی میں نگلیریا والا جراثیم آیا اور یہ بات صاف ہے کہ پانی ناک میں ڈالنے سے اس وائرس کا متاثر کرنے کا خطرہ ہوتا ہے، تو میں ناک میں پانی نہیں ڈال سکتا، بہت کوشش کرکے بھی , میں معذور ہوں ایسا کرنے سے، اس وجہ سے میں نہ نماز پڑھنے جا سکتا ہوں، نہ ہی کچھ اور اسلامی کام کر سکتا ہوں، بس جہاں تک ہو سکتا ہے پانی استعمال کر لیتا ہوں، اور باقی تیمم کر لیتا ہوں، مگر پھر بھی دل مطمئن نہیں ہوتا اس لئے فتوی لینا چاہتا ہوں، ایک بار پھر بتا دوں کہ سالہا سال سے کوشش کے باوجود ناک میں پانی نہیں ڈال سکتا، اور نہ آگے ڈال پاؤںگا، کیا ایسی صورت میں میرا مذہب اسلام مجھے اجازت دیتا ہے کہ میں نماز اور باقی اسلامی احکامات پر عمل کر سکوں، یا ایسے ہی بغیر نماز اور اسلامی معاملات کے پھرتا رہوں؟ مہربانی کر کے مجھے جلدی بتائیں تاکہ میں نماز اور دیگر احکامات پر عمل کر سکوں، ایک بات صاف کردوں کہ خوف کے باعث میں ناک میں پانی ڈالنے سے قطعی طور پر معذور ہوں؟ شکریہ

الجوابُ حامِدا ًو مُصلیِّا ً

سائل کو اگر واقعی کوئی بیماری نہ ہوتو شک اور وساوس کیوجہ سے ناک میں پانی نہ ڈالنا اور اس کی وجہ سے نمازیں اور دیگر عبادات ترک کردیناجائز نہیں، لہذا سائل کو چاہیئے کہ وساوس سے نکلے اورعبادات کی ادائیگی کی بھر پور کوشش کرے،اور اس کے ساتھ ساتھ قرآن مجید کی آیت مبارکہ:
(رَبِّ أَعُوذُ بِكَ مِنْ هَمَزَاتِ الشَّيَاطِينِ (97) وَأَعُوذُ بِكَ رَبِّ أَنْ يَحْضُرُونِ (98)سورۃ المؤمنون)
کثرت کیساتھ پڑھنے کا اہتمام کرے، انشاء اللہ امید ہے کہ سائل کو وساوس کی بیماری سے نجات حاصل ہوگی، اور جب تک اس بیماری سے نجات حاصل نہ ہو، تب تک فرض غسل کے علاوہ ناک میں پانی ڈالے بغیر بھی وضو کرکے عبادات ادا کرنے کا اہتمام کرسکتے ہیں۔

مأخَذُ الفَتوی

کما فی الھندیۃ: وإذا خاف المحدث إن توضأ أن يقتله البرد أو يمرضه يتيمم. هكذا في الكافي واختاره في الأسرار لكن الأصح عدم جوازه إجماعا كذا في النهر الفائق والصحيح أنه لا يباح له التيمم. كذا في الخلاصة وفتاوى قاضي خان (الی قولہ) ولا يجمع بين الغسل والتيمم الخ (ج1 صـ28 کتاب الطہارۃ الباب الرابع فی التیمم الفصل الاول ط: دارالفکر)۔