کیا مزدور کو روٹی،کپڑا ،مکان اور طبی سہولیات دینا مالک کی ذمہ داری ہے؟

السلام علیکم ورحمۃ اللہ وبرکاتہ!
کیا مزدور کو روٹی،کپڑا ،مکان اور طبی سہولیات دینا مالک کی ذمہ داری ہے؟ اگر ریاست اسے دینے پر مجبور کرے تو مالک کو کیا کرنا چاہیے؟ فقہ اسلامی کی روشنی میں جواب درکار ہے۔جزاک اللہ خیرا ً

الجوابُ حامِدا ًو مُصلیِّا ً

واضح ہوکہ شرعی طورپر مالک کی یہ ذمہ داری نہیں بنتی کہ وہ مزدور کو روٹی،کپڑا،مکان اور طبی سہولیات فراہم کرے،البتہ اگر مالک نے ملازم کے ساتھ شروع معاہدہ میں ہی بنیادی تنخواہ کے ساتھ مذکورہ سہولیات دینا بھی طے کیا ہو یا عرف میں مذکورہ سہولیات ملازمین کو فراہم کرنا مالک کی ذمہ داری ہو تو ایسی صورت میں مالک کا اپنے ملازمین کو مذکورہ سہولیات فراہم کرنا ضروری ہوگا،اور ایسی صورت میں مالک کو حکومت کی طرف سے ان سہولیات کی ادائیگی کا پابند بنایا جاسکتا ہے،تاہم اگر مالک کی طرف سے اپنے ملازمین کے ساتھ کوئی معاھدہ نہ ہو اور نہ ہی ایسی سہولیات ملازمین کو فراہم کرنا معروف ہو تو ایسی صورت میں مالک کے ذمہ مذکورہ سہولیات کی فراہمی لازم نہ ہوگی،اور نہ ہی حکومت کی طرف سے اسے جبراً پابند کرنا جائز ہوگا۔

مأخَذُ الفَتوی

کمافی رد المحتار: استأجر عبدا أو دابة على أن يكون علفها على المستأجر، ذكر في الكتاب أنه لا يجوز.
وقال الفقيه أبو الليث: في الدابة نأخذ بقول المتقدمين، أما في زماننا فالعبد يأكل من مال المستأجر عادة اهـ.
قال الحموي: أي فيصح اشتراطه. واعترضه ط بقوله فرق بين الأكل من مال المستأجر بلا شرط ومنه بشرط اهـ. أقول: المعروف كالمشروط(6/ 47)۔
وفی الفتاوى الهندية: وليس على المستأجر طعامه إلا أن يتطوع بذلك أو يكون فيه عرف ظاهر(4/ 435)۔