حالت حیض میں مہندی لگانا اور طہارت کے بعد فورا نہانے کا حکم

السلام علیکم چند غلط فہمیوں کے سلسلے میں سوالات ہیں درست کردیجئے
(۱)۔ چند عورتوں میں یہ بات ہے کہ حیض کے دوران اگر مہندی لگائی، تو پانچ یا سات دن میں مہندی کا رنگ نہیں اُترتا ،تو اس کی وجہ سے غسل قبول نہیں یعنی نہیں ہوتا ،کیا یہ درست ہے؟
(۲)۔ کیا حیض کے بعد کے غسل میں بالوں کا صاف کرنا ضروری ہے یا جب بھی چالیس دن کے اندر صاف کرلئے جائیں، ہماری روش یہ ہے کہ حیض کے بعد کے غسل میں صاف کرتے ہیں، مگر اکثر کسی وجہ یا ٹائم کی کمی یا صاف کرنے کیلئے کچھ میسر نہیں ہوتا ،تو ایسے ہی غسل کرلیتے ہیں ،تاکہ نماز پڑھ سکیں اس کا کیا حکم ہے؟
(۳)۔ اکثر اگر آپ کریم سے صاف کریں تو مکمل بال جڑ سے صاف نہیں ہوتے اوپر اوپر سے ہوتے ہیں، کیا جڑ سے صاف کرنا ضروری ہے؟
(۴)۔ ہمارے بڑے کہتے ہیں کہ جب تک ۷ دن نہ ہوں، تو مت نہاؤ اور میں نے کتابوں میں پڑھاہے کہ جب خون ختم ہوگیا، تو نہالو اس پر بحث ہے اس معاملہ سے آگاہ کریں؟
(۵)۔ کچھ لوگوں سے سناہے کہ ایک دفعہ وضو کرکے اس سے نماز پڑھ لیجیے اگر بیچ میں ہوا نکلے تو کچھ نہیں ہوتا ،اگلی نماز میں ضو کرلیں میں نے ایسانہیں پڑھا اس کے متعلق بتائیں؟
(۶)۔ کیا ہم خود گھر میں تفسیر قرآن مجید پڑھ سکتے ہیں ؟ہمارے گھر میں مفتی شفیع عثمانی صاحب کی تفسیر موجود ہے خود پڑھ لیں یا کسی استاد سے پڑھنا چاہیے؟

الجوابُ حامِدا ًو مُصلیِّا ً

(۱)۔ واضح ہو کہ مذکور بات کی شرعاً کوئی حیثیت اور حقیقت نہیں، بلکہ اس حالت میں بھی مہندی لگانے کے بعد غسل کی درستگی میں کوئی فرق نہیں پڑتا اور غسل بلا شبہ ہوجائے گا۔
(۲)۔ واضح ہو کہ زیرِ ناف اور دیگر غیر ضروری بال ہر ہفتہ صاف کرنا مستحب ہے اور پندرہ دن میں ایک بار صاف کرنا جائز ہے اور چالیس دن کے بعد تک چھوڑے رکھنا ناجائزاور گناہ کی بات ہے ،جبکہ ان کا حیض کے بعد کے غسل میں صاف کرنا کوئی ضروری اور لازمی نہیں، کسی وقت بھی کرسکتے ہیں اور اگر اس عادت کا دورانیہ چالیس دن سے کم بنتاہو، تو ماہواری کے غسل کے بعد بھی صاف کرسکتی ہیں۔
(۳)۔ واضح ہو کہ کسی کریم اور پاؤڈر کے ذریعے بھی غیر ضروری بالوں کو صاف کرنا درست ہے، خواہ اس سے وہ جلد کے اوپر اوپر سے صاف ہوتے ہوں، اس میں شرعاً کوئی قباحت نہیں اور نہ ہی اس صفائی میں مبالغہ شرط ہے۔
(۴)۔ واضح ہوکہ جب کسی عورت کو اس کی عادت کے مطابق حیض بند ہوجائے تو نماز کے آخر وقت تک انتظار کرے اور جب نماز کا وقت نکلنے کا اندیشہ ہو تو غسل کرلے، مزید انتظار نہ کرے، اور اگر دس دن پورے ہونے پر خون بند ہو تو اسی وقت غسل کرے اور بلا وجہ تاخیر کرنے سے احتراز کرے۔
(۵)۔ واضح ہو کہ سبیلین سے ہوا کے خارج ہونے سے بہر صورت وضو ٹوٹ جاتاہے چاہے نماز میں ہو یا نماز کےعلاوہ ہو۔
(۶)۔ بہتر تو یہ ہے کہ قریب کے کسی مدرسۃ البنات جاکر کسی مستند معلمہ سے جو علم تفسیر پر مہارت رکھتی ہو، پہلے اس سے پڑھیں اور پھر اس کی اجازت سے اور اس کی راہنمائی میں خود بھی مطالعہ کرسکتی ہیں۔

مأخَذُ الفَتوی

فی الدر المختار: (ولا يمنع) الطهارة (ونيم) أي خرء ذباب وبرغوث لم يصل الماء تحته (وحناء) ولو جرمه به يفتى(1/ 154)۔
وفی الرد: صرح به فی المنیة عن الذخیرة فی مسألة الحناء والطین والدرن معللًا بالضرورة. (۱/ ۱۵۴)
فی الدر المختار: ویستحب حلق عانته وتنظیف بدنه بالاغتسال فی کل اسبوع مرة وجاز فی کل خمسة عشرة وکره ترکه وراء الاربعین. (۶/ ۴۰۶)
فی احکام تجمیل النساء ان السنة للمرأة النتف.... ویتأدی اصل السنة بکل مزیل. (۷۵)
وفی الفتاویٰ التاتار خانیة: واذا مضت مدة الحیض وهی اکثر المدة عشرة ایام یحکم بطهارتها انقطع الدم اولا اغتسلت أو لم تغتسل مبتدأة کانت او معتادة ولا تؤخر الاغتسال لوقوع التیقن بخروجها عن الحیض... او کانت معتادة وانقطع الدم علی عادتها او فوق عدادتها... اخرت الغسل الی آخر الصلٰوة فاذا خافت فوت الصلٰوة اغتسلت وصلت وانما اخرت الاغتسال والصلوٰة احتیاطًا للاحتمال ان یعاودها الدم فی العشرة ولیس فی هذا التاخیر تفویت الشئی ولٰکن انما تؤخر الاغتسال والصلٰوة الٰی آخر وقت المستحب دون الوقت المکروه. (۱/ ۳۳۴)
فی الشامیة تحت (قوله مثل ریح) فانها تنقض لأنها منبعثة عن محل النجاسة. (۱/ ۱۳۵)۔