ایک ساتھ عید منانے سے متعلق حدیث کے بارے سوال

السلام علیکم !میں لندن ، انٹاریو ، کنیڈا میں رہتا ہوں، ادھر لندن میں دو مساجد ہیں ایک (ISNA) کی پیروی کرتی ہے اور دوسری سعود یہ عربیہ کی تاریخ کے مطابق چلتی ہے ۔ (ISNA) نے ایک کیلنڈر بنایا ہے۔ جس میں اگلے چار سال کی تاریخ طے کر دی گئی ہے عید اور رمضان کے لئے ، سعودیہ کا جو کیلنڈر ہے وہ صرف سعودیہ کے لئے ہے اور اس میں کبھی کبھی سعودی علماء کی طرف سے تبدیلی ہوتی ہے۔ میں یہ جاننا چاہتا ہوں کہ ان دونوں میں سے کس کیلنڈر پر عمل کروں؟ میں یہ سوال اس لئے لکھ رہا ہوں کہ یہاں کے مسلمان یہ سمجھتے ہیں کہ کچھ احادیث میں وارد ہوا ہے کہ مسلمانوں کو عید اور رمضان سب کو ایک ساتھ منانا چاہئیے تاکہ لوگوں میں اتحاد قائم رہے اگر چہ تاریخ غلط ہو۔

الجوابُ حامِدا ًو مُصلیِّا ً

ایسی کوئی حدیث تو ہماری نظر سے نہیں گزری کہ مسلمان عید اور رمضان ایک ساتھ منائیں اگر چہ تاریخ غلط ہو جائے؟ البتہ یہ حدیث صحیح ہے کہ جب چاند دیکھو تو روزہ رکھو اور چاند دیکھو تو افطار (عید) کرو۔ اس لئے شہادتِ شرعیہ سے جب رویت ثابت ہو جائے تو اسی کے مطابق عمل چاہے وہ سعودیہ عربیہ یا کسی دوسرے کیلنڈر وغیرہ کے موافق ہو یا مخالف اور یہی اصل ہے۔

مأخَذُ الفَتوی

ففي مشكاة المصابيح : عن أبي هريرة رضي الله عنه قال: قال رسول الله صلى الله عليه وسلم: «صوموا لرؤيته وأفطروا لرؤيته فإن غم عليكم فأكملوا عدة شعبان ثلاثين» (1/ 615)