حضرت خریم بن فاتکؓ کے ایمان لانے کا واقعہ

کیا فرماتے ہیں علماءِ کرام اس مسئلہ کے بارے میں کہ کیا مندرجہ ذیل واقعات درست ہیں؟
(۱) حضرت ابوہریرہؓ فرماتے ہیں کہ جب میں ایمان لایا تو میں اونٹ چراتا تھا تو مجھے دیر ہوگئی جنگل میں، تو میں نے یعنی حضرت ابوہریرہ نے اسی جنگل میں یہ کہا کہ میں نے اپنی جان ان جنات کے بڑے کو حوالے کی ہے تو غیب سے آواز آئی کہ تم ایک اللہ پر ایمان لاؤ اور جاؤ ، مدینہ منورہ میں ایک نبی ہے اس پر ایمان لاؤ ، آیا یہ واقعہ سچ ہے یا نہیں؟
پھر یہ واقعہ حضرت عمرؓ کو بیان کیا تو انہوں نے یہ فرمایا کہ اگر آپ کا یہ واقعہ سچ نہ ہو ا تو میں آپ کو سزا دوں گا آپ اس واقعہ کا گواہ پیش کریں تو حضرت عثمانؓ نے فرمایا کہ اس کا گواہ میں ہوں۔
(۲) ایک چرواہا بکریاں چراہا رہا تھا کہ وہاں پر بھیڑیئے نے اس سے یہ کہا کہ جاؤ مدینہ جاؤ اور وہاں پر ایک نبی ہے، اس پر ایمان لے آؤ ، وہ آئے اور حضور ﷺ پر ایمان لے آئے، آیا یہ واقعہ بھی صحیح ہے یا نہیں؟ اور اس میں یہ بھی ہے کہ حضور ﷺ کو وحی کے ذریعے معلوم ہو ا ا س واقعہ کا تو اچانک وہی چرواہا آگیا۔
(۳) اور ایک صحابی کے بارے میں آتا ہے کہ ان کو بت نے دعوت دی کہ تم اللہ پر ایمان لے آؤ ،اس لئے کہ ہمارا دور چلا گیا، ان صحابی کا نام کیا ہے اور یہ واقعہ صحیح ہے یا نہیں؟ امید ہے کہ مدلل جواب دے کر مشکور فرمائیں گے۔

الجوابُ حامِدا ًو مُصلیِّا ً

(۱) سوال میں مذکور تینوں واقعات درست اور کتبِ حدیث میں موجود ہیں چنانچہ پہلا واقعہ حضرت ابوہریرہؓ کے ساتھ پیش نہیں آیا بلکہ حضرت ابوہریرہؓ اس حدیث کے راوی ہیں اور یہ واقعہ حضرت خریم بن فاتکؓ کے ساتھ پیش آیا جس کی پوری تفصیل حیاۃ الصحابہ جلد۳، صفحہ ۵۶۶ پر موجود ہے۔
(۲) اور دوسرا واقعہ ایک چرواہے کا ہے مگر اس میں یہ بات کہ ’’آپ ﷺ کو بذریعہ وحی معلوم ہوگیا تھا،ا لخ‘‘ نہیں ہے اس کی پوری تفصیل بھی حیاۃ الصحابہ جلد ۳، ص۶۰۱ پر اور البدایہ والنہایہ جلد۶، ص۱۵۰ پر بھی موجود ہے۔
(۳) یہ واقعہ حضرت عباس بن مرداس اسلمی کے ساتھ پیش آیا اس کی تفصیل بھی حیاۃ الصحابہ جلد ۳، ص۵۷۱ پر موجود ہے۔