کیا ہر بچے کی ولادت کے بعد چالیس روز تک عورت کو نماز، روزہ وغیرہ اعمال ترک کرنے ہونگے

کیا فرماتے ہیں علماءِ کرام ومفتیانِ عظام اس مسئلہ کے بارے میں کہ ہمارے گھر کی بزرگ خواتین یہ کہتی ہیں کہ بچہ ہونے کے بعد چالیس دن تک نماز، قرآ ن اور دوسری قرآ نی آیات نہیں پڑھنی چاہیۓ۔
اس بارے میں ارشاد کی بہن، جو کہ عالمہ بھی ہے سے معلوم کیا تو انہوں نے بتایا کہ پہلے بچہ کے ہونے کے بعد جتنے دن تک ’’مینسز‘‘ جاری رہیں، ہر بار اتنے دن شمار کیے جائیں گے۔
اب مسئلہ یہ ہے کہ میرے ہر بار دن کم ہوتے گئے جیسے ۲۵ پھر ۲۲ پھر ۱۵ اور ’’DNS‘‘ ہوئے ۱۲ دن ، مگر مینسز وہ نو دن میں ہی ختم ہو چکے ہیں ، تو اب کیا باقی دنوں کی نمازیں ادا کی جائیں گی؟

الجوابُ حامِدا ًو مُصلیِّا ً

سوال میں مذکور دونوں قول درست نہیں، ان پر عمل سے احتراز چاہیۓ، اور درست قول یہ ہے کہ نفاس کی مدت زیادہ سے زیادہ چالیس دن ہے، اور کم کی کوئی حد نہیں، اس لۓ اولاد کی ولادت کے بعد چالیس دن کے اندر جتنے دن تک بھی خون نظر آئے یہ نفاس ہے اور اس دوران نماز، روزہ جائز نہیں، جبکہ چالیس سے کم دنوں کی کسی خاص مدت کے مطابق عادت بھی بن سکتی ہے اور ہر دفعہ ایّام کی کمی بیشی کی بنا پر یہ عادت ختم بھی ہو سکتی ہے۔ لہٰذا سوال میں مذکو رخاتون کی جب کوئی عادت متعیّن نہیں، تو ولادت کے بعد جتنے دن وہ خون دیکھا کرے اسے نفاس شمار کیا کرے اور مینسز (ماہواری کے خون) کا حکم اس سے الگ ہے، پس بچے کی ولادت کے بعدجتنے دن تک خون دیکھا تھا اس کے بعد جتنے دن نماز نہیں پڑھی، ان سب ایام کی نمازوں کی قضاء لازم ہے، جس کی ادائیگی ضروری ہے۔

مأخَذُ الفَتوی

فی الدر المختار: فإن انقطع على أكثرهما أو قبله فالكل نفاس. وكذا حيض إن وليه طهر تام وإلا فعادتها وهي تثبت وتنتقل بمرة اھ(1/ 301)۔
وفی حاشية ابن عابدين: وإن لم يجاوز انتقلت العادة إلى ما رأته والكل نفاس اھ(1/ 301)۔