قرآن کریم کا درس افضل ہے یا فضائلِ اعمال کی تعلیم؟

کیا فرماتے ہیں علماءِ کرام و مفتیان کرام مذکور مسئلہ کے بارے میں کہ ہماری مسجد میں بعد نمازِ عشاء امام صاحب روزانہ قرآن کریم کا درس دیتے ہیں ،جبکہ مسجد کے بیرونی حصے میں فضائلِ اعمال کی تعلیم ہوتی ہے ، بعض حضرات کہتے ہیں کہ قرآن کا درس افضل و بہتر ہے، جبکہ بعض کا کہنا ہے کہ فضائلِ اعمال کی تعلیم بہتر ہے ، براہِ کرم شریعت مطہرہ کی روشنی میں واضح فرمائیں کہ کونسا بہتر ہے، جبکہ درسِ قرآن پہلےشروع ہوا اور تعلیم بعد میں شروع ہوئی ۔

الجوابُ حامِدا ًو مُصلیِّا ً

واضح ہو کہ قرآن کریم کی نمایاں فضیلت ہونے کی بناء پر اس کے درس کے افضل ہونے میں کوئی شبہ نہیں ، اور پھر اگر اس میں عمومی مسائل و فضائل اعمال پر بھی روشنی ڈال دی جائے تو یہ عمل مستقلاً تعلیم کی ضرورت بھی پوری کر سکتاہے،اس لیے اہلِ محلہ کو بلا وجہ باہم اختلاف و انتشار کا باعث ہونے کے بجائے دونوں ہی امور بجالانے کی کوشش اور انہیں باہم مقابل ٹھہرانے کی کو شش سے بہرحال احتراز لازم ہے ۔
پھر جب درسِ قرآن کا سلسلہ پہلے سے جاری ہے تو بہتر ہے کہ فضائل اعمال کی تعلیم کیلۓ کسی دوسرے وقت کا انتخاب کیا جائے ، اور اگر درس مختصر ہوتا ہو تو اس کے بعد بھی تعلیم کا حلقہ قائم کیا جاسکتا ہے، جبکہ اختلاف و نزاع کی صورت بنا لینا بہر صورت ناپسندیدہ ہے جس سے بچنا ضروری ہے۔

مأخَذُ الفَتوی

فی صحيح البخاري : عن عثمان بن عفان ، قال : قال النبي صلى الله عليه و سلم : « إن أفضلكم من تعلم القرآن و علمه اھ(6/ 192)۔
و فی الصحيح لمسلم : عن أبي هريرة قال : قال رسول الله صلى الله عليه و سلم : «من نفس عن مؤمن كربة من كرب الدنيا ، نفس الله عنه كربة من كرب يوم القيامة ، و ما اجتمع قوم في بيت من بيوت الله ، يتلون كتاب الله ، و يتدارسونه بينهم إلا نزلت عليهم السكينة ، و غشيتهم الرحمة و حفتهم الملائكة ، و ذكرهم الله فيمن عنده ، و من بطأ به عمله ، لم يسرع به نسبه» اھ (4/ 2074)۔