حیض کا خون بند ہونےکےبعد غسل سے پہلے ہمبستری کرنا

مفتی صاحب میرا سوال یہ ہے کہ حیض کے سات دن ختم ہو جانے کے بعد بیوی کے نہانے سے پہلے میاں بیوی ازدواجی تعلقات کام کرسکتے ہیں۔ اور اگلے روز بیوی مکمل غسل کرلے یہ جائز ہے اور اگر ناجائز ہے تو اس کے کس قسم کے نقصانات رزق ‘روزی پر تو نہیں پڑتے۔ میری مکمل رہنمائی فرمائیں۔ شکریہ

الجوابُ حامِدا ًو مُصلیِّا ً

واضح ہوکہ اگر عورت کی عادت دس دن سے کم کی ہو اور حیض کا خون عادت پر بند ہوجائے تو جب تک عورت غسل کرکے پاک نہ ہوجائے، تب تک شوہر کے لئے اس کے ساتھ ہمبستری کرنا شرعاً درست نہیں،اگر غسل نہ کرے،لیکن اس پر ایک نماز کا مکمل وقت گذر جائے اور نماز کی قضاء اس کے ذمہ لازم ہوجائے،یعنی خون ایسے وقت بند ہوکہ جس میں غسل کے بعد کپڑے پہن کر صرف تکبیر تحریمہ کہہ سکے تو ایسی صورت میں نماز کا وقت گزرنے کے بعد بغیر غسل کیے بھی ہمبستری کرنا شرعاً جائز ہے،البتہ اس صورت میں بھی ہمبستری سے قبل غسل کرلینا بہتر ہے۔

مأخَذُ الفَتوی

کما قال اللہ تعالیٰ: وَيَسْأَلُونَكَ عَنِ الْمَحِيضِ قُلْ هُوَ أَذًى فَاعْتَزِلُوا النِّسَاءَ فِي الْمَحِيضِ وَلَا تَقْرَبُوهُنَّ حَتَّى يَطْهُرْنَ فَإِذَا تَطَهَّرْنَ فَأْتُوهُنَّ مِنْ حَيْثُ أَمَرَكُمُ اللَّهُ إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ (البقرۃ: 222 الآیة)۔
وفی رد المحتار: اعلم أنه إذا انقطع دم الحائض لأقل من عشرة وكان لتمام عادتها فإنه لا يحل وطؤها إلا بعد الاغتسال أو التيمم بشرطه كما مر؛ لأنها صارت طاهرة حقيقة أو بعد أن تصير الصلاة دينا في ذمتها، وذلك بأن ينقطع ويمضي عليها أدنى وقت صلاة من آخره، وهو قدر ما يسع الغسل واللبس والتحريمة اھ(1/295)۔