سرکاری ملازم کا عام ضابطہ سے ہٹ کر میڈیکل پر جانا اور بچہ کو نوکری دلوانا

میں ایک سرکاری ملازم ہوں بطور استاد ڈیوٹی انجام دے رہا ہوں , اچھی کارکردگی ہے،لیکن حالات اور حکومت کا رویہ آجکل ملازمین سے اچھا نہیں، عزت بھی نہیں تو میں پنشن لینا چاہتا ہوں لیکن سارے راستے بند ہیں , ایک راستہ میڈیکل کا ہے اگر میں میڈیکل پہ جاؤں تو کچھ رقم کے ساتھ ساتھ ایک بچے کو دوبارہ نوکری بھی مل سکتی ہے , اس بارے میں راہنمائی فرمائیں, بڑی مہربانی ہوگی۔

الجوابُ حامِدا ًو مُصلیِّا ً

سائل اگر اس ملازمت کو مزید جاری نہ رکھنا چاہتا ہو تو اسے چاہیۓ کہ باضابطہ درخواست دے کر ضابطہ کی کاروائی مکمل کرنے کے بعد حکومت سے ریٹائرمنٹ اور پنشن وصول کرے ،تاہم اگر مقررہ وقت سے پہلے قانونی طور پر ریٹائرمنٹ کی اجازت نہ ہو تو اس صورت میں ریٹائرمنٹ کے لئے سوال میں مذکور "میڈیکل پر جانے" سے مراد اگر یہ ہو کہ سائل میڈیکل رپورٹ کے ذریعے جھوٹ اور دھوکہ دہی سے خود کو بیمار اور مذکور ملازمت کی سر انجام دہی سے معذور ظاہر کر کے اپنی جگہ اپنے بچے کی تقرری کروادے , تو یہ فعل جھوٹ اور دھوکہ دہی پر مبنی ہونے کی وجہ سے شرعاً جائز نہیں،جس سے اجتناب لازم ہے۔

مأخَذُ الفَتوی

کما فی مسند أحمد مخرجا : حدثنا وكيع قال : سمعت الأعمش قال : حدثت عن أبي أمامة قال: قال رسول الله صلى الله عليه و سلم : «يطبع المؤمن على الخلال كلها إلا الخيانة و الكذب» (36/ 504)-
و فی صحيح البخاري : عن عبد الله بن عمرو أن النبي صلى الله عليه و سلم قال : " أربع من كن فيه كان منافقا خالصا ، و من كانت فيه خصلة منهن كانت فيه خصلة من النفاق حتى يدعها . إذا اؤتمن خان ، و إذا حدث كذب ، و إذا عاهد غدر ، و إذا خاصم فجر "(1/ 16)