ٹیکس چور کمپنی میں ملازمت کرنا

کیا فرماتے ہیں مفتیان کرام اس مسئلہ کے بارے میں کہ ایک آدمی ایک پرائیویٹ سگریٹ فیکٹری میں کام کرتا ہے ،اور اس کا کام ہے رات کے وقت ٹرک لوڈ کرنا, مطلب وہ مزدور جو ٹرک لوڈ کرتے ہیں اس کی نگرانی کرتا ہے, رات کے وقت ،اب مسئلہ یہ ہے کہ فیکٹری والے یہ گاڑیاں چوری چھپے نکالتے ہیں ،مطلب فیکٹری کے مالکان ان سگریٹ کے کاٹن پر ٹیکس نہیں دیتے جو حکومت وقت نے ان پر مقرر کیا ہے ،مثال کے طور پر وہ ایک شفٹ میں 400 کاٹن بناتے ہیں , تو حکومت کو 10 یا 20 دکھاتے ہیں کہ ہم نے یہ بنائے ہیں ،اب مہربانی کرکے ہمیں یہ بتائیں کہ اس میں نوکری کرنا کیسا ہے ؟ خاص کر جو بندہ گاڑیوں کی لوڈ نگ کی نگرانی کرتا ہے رات کے وقت ؟

الجوابُ حامِدا ًو مُصلیِّا ً

سوال میں درج کردہ بیان کے حقیقت پر مبنی ہونے اور اس طرح کمپنی انتظامیہ کے مذکور عمل کے جائز ہونے یا نہ ہونے سے قطع نظر اگر سائل کی ڈیوٹی رات کے وقت کام کرنے والے مزدوروں کی نگرانی ہو اور سائل کا حساب کتاب کے ساتھ کوئی واسطہ اور تعلق نہ ہو تو ایسی صورت میں سائل کیلئے مذکور ملازمت اختیار کرنے اور اس سے حاصل شدہ آمدنی کو اپنے استعمال میں لانے کی اجازت ہے ۔

مأخَذُ الفَتوی

کما فی الشامیۃ :(قوله وجاز إجارة بيت إلخ) هذا عنده أيضا لأن الإجارة على منفعة البيت، ولهذا يجب الأجر بمجرد التسليم، ولا معصية فيه وإنما المعصية بفعل المستأجر وهو مختار فينقطع نسبيته عنه، اھ (6/392)
وفی الفتاوی الھندیۃ :إذا استأجر رجلا ليحمل له خمرا فله الأجر في قول أبي حنيفة - رحمه الله تعالى - وقال أبو يوسف ومحمد - رحمهما الله تعالى - لا أجر له اھ (4/449)