ویب سائٹ پر پڑھانے کے لئے اپلائی کر کے اجرت لینا

ایک آن لائن پڑھانے والی ویب سائٹ ہے ، جہاں اساتذہ طلباء کو آن لائن پڑھا سکتے ہیں ، وہاں یہ صورت ہے کہ طالب علم جاب پوسٹ کرتا ہے یعنی اسے اس مضمون میں مدد درکار ہے وغیرہ ، پھر اساتذہ اس کے لئے اپلائی کرتے ہیں۔ مسئلہ یہ ہے کہ اگر زیادہ اساتذہ اس جاب کے لئے اپلائی کرتے ہیں تو قیمت بڑھ جاتی ہے اور اگر کم اساتذہ اپلائی کریں تو قیمت کم ہو جاتی ہے۔ کیا ایسی صورت میں کسی جاب کے لئے وہاں اپلائی کرنا درست ہے؟ واضح کر دوں کہ قیمت سے مراد وہ ہے جو اپلائی کرنے کے لئے اساتذہ کو درکار ہوتی ہے ، مثلاً 500 ، اگر آپ کے پاس 500 نہیں ہے تو اس مخصوص جاب کے لئے اپلائی نہیں کر سکتے، سکوں کی صورت میں ہوتی ہے یہ۔ اب اگر زیادہ اساتذہ نے اپلائی کیا ہے تو قیمت بڑھ جائے گی ، اور طلبا ء کی مرضی جس استاد کو منتخب کریں ، اگر کسی جاب کے لئے کم استاد اپلائی کرتے ہیں تو قیمت بھی کم ہو جاتی ہے ، مثلا 200 والے بھی اپلائی کر سکیں گے ۔

الجوابُ حامِدا ًو مُصلیِّا ً

واضح ہو کہ کسی بھی ویب سائٹ پر آن لائن پڑھائی کے لئے اپلائی کرنا اور کام ملنے پر طلباء کو پڑھاکر اس کی اجرت لینا ہر دو امور شرعاً جائز اور درست ہے ، تاہم سوال میں مذکور ویب سائٹ پر ملازمت کے لئے اپلائی کرنے کا جو طریقہ کار لکھا گیا ہے کہ اس میں اپلائی کرنے کے لئے سکوں کی شکل میں کچھ رقم جمع کرانی پڑتی ہے جو افراد بڑھ جانے سے زیادہ اور کم ہو جانے کی صورت میں کم ہو جاتی ہے ، اس جمع ہونے والی رقم کی حیثیت اور طریقہ کار واضح نہیں ہے کہ یہ رقم کونسی کرنسی میں جمع کرائی جاتی ہے اور اس کے جمع کرنے کا مقصد کیا ہو تا ہے ؟ نیز افراد زیادہ یا کم ہونے کی وجہ سے رقم میں کمی بیشی کیوں ہوتی ہے ؟ اس لئے اگر اس کی مکمل تفصیل اور وضاحت فراہم کردی جائے تو اس پر مکرر غور کرکے حکمِ شرعی سے آگاہ کیا جا سکتا ہے ۔

مأخَذُ الفَتوی

وفي رد المحتار : تحت ( قوله مع الماء ) وفي الحاوي : سئل محمد بن سلمة عن أجرة السمسار ، فقال : أرجو أنه لا بأس به وإن كان في الأصل فاسدا لكثرة التعامل وكثير من هذا غير جائز ، فجوزوه لحاجة الناس إليه كدخول الحمام الخ ( مطلب في أجرة الدلال ، ج 6 ، ص 63 ، ط : سعيد ) –
و في خلاصة الفتاوى : وفی الاصل اجرۃ السمسار والمغاری والحمامی والصکاک ومالا تقدیر فیہ للوقت ولامقدار لما یستحق بالعقد لکن للناس فیہ حاجۃ جاز وان کان فی الاصل فاسدًا". ( كتاب الإجارات ، الفصل الثاني في صحة الإجارة و فسادها ، ج 3 ، ص 116 ، ط : رشيدية ) –