پاکی کے ایام میں عورت کو خاکی مادہ آنے کا حکم

میری زوجہ کی ماہواری 4 سے7 تاریخ کو شروع ہوتی ہےاور 7 دن وہ پاک ہو جاتی ہے 2 ماہ سے 13 تاریخ کو پاک ہونے کے 10 دن بعد 23 تاریخ کو خاکی مادہ آتا ہے دن میں دو تین دفعہ اور ایک آدھ دن پاکی آکر پھر سے خاکی مادہ نکلتا ہے اور اسی طرح ہوتے ہوتے 6،7 تاریخ کو مینسیز آجاتے ہیں، سوال یہ ہے کہ یہ استحاضہ شمار ہوگا کہ نہیں؟ کیونکہ پاکی اور ناپاکی کی تاریخ وہی 6 سے 13 ہے، ہر ماہ بس مادہ پاکی کے بعد آتا ہے اور نماز قرآن اور شوہر کے قریب جانے کا حکم بھی واضح کریں ۔شکریہ !جزاک اللہ خیر !

الجوابُ حامِدا ًو مُصلیِّا ً

صورت مسئولہ میں جب سائل کی اہلیہ کے ایام عادت ( سات سے تیرہ تاریخ ) متعین ہے ، تو دو ماہواریوں کے درمیان مدت طہارت میں دو ماہ سے وقتاً فوقتاً آنے والا خاکی رنگ کا خون استحاضہ شمار ہو گا ، اور اس دوران میاں بیوی کے لئے ازدواجی تعلق سمیت سائل کی اہلیہ پر نماز ، روزہ وغیرہ دیگر احکام شرعیہ کی پابندی لازم ہو گی ۔

مأخَذُ الفَتوی

کما فی الھدایۃ : اقل الحیض ثلثۃ ایام و لیالیھا و ما نقص من ذلک فھو استحاضۃ لقولہ علیہ السلام اقل الحیض للجاریۃ البکر و الثیب ثلثۃ ایام و لیالیھا و اکثرہ عشرۃ ایام و الزائد استحاضہ الخ ( باب الحیض و الاستحاضۃ ، ج 1 ، ص 60 ، ط : رحمانیہ ) ۔
و فیہ ایضاً : و المستحاضۃ و من بہ سلس البول و الرعاف الدائم و الجرح الذی لا یرقأ یتوضؤن لوقت کل صلوۃ فیصلون بذلک فی الوقت ما شاؤا من الفرائض و النوافل الخ ( ج 1 ، ص 65 ، ط : رحمانیۃ ) ۔
و فی الدر المختار : ( و اقل الطھر ) بین الحیضتین أو النفاس و الحیض ( خمسۃ عشر ) و لیالیھا اجماعاً ( باب الحیض ، ج 1 ، ص 285 ، ط : سعید ) ۔
و فیہ ایضآً : ( و دم استحاضۃ ) حکمہ ( کرعاف دائم ) وقتاً کاملاً ( لا یمنع صوما و صلاۃ ) و لو نفلا ( و جماعا) لحدیث " توضئی و صلی و ان قطر الدم علی الحصیر " ( باب الحیض ، ج 1 ، ص 298 ، ط : سعید ) ۔
و فی الھدایۃ : ان الطھر اذا کان اقل من خمسۃ عشر یوماً لا یفصل و ھو کلہ کالدم المتوالی لانہ طھر فاسد فیکون بمنزلۃ الدم و الاخذ بھذا القول ایسر الخ ( باب الحیض و الاستحاضۃ ، ج 1 ، ص 64 ، ط : رحمانیہ ) ۔واللہ اعلم