عورت کی شرمگاہ سے نکلنے والی رطوبت کے مسائل

ایک عورت کی عمر 55 سال ہے ، ماہواری بند ہوئے دس بارہ سال گزر چکے ہیں ، اس دوران قطروں یا خون وغیرہ کا کبھی کوئی مسئلہ نہیں ہوا ، اب اچانک کچھ دن سے پیشاب والی جگہ پہ نمی محسوس ہوتی ہے، کچھ پتا نہیں کہ یہ کیا ہے،اچھے طریقے سے استنجا کر کے وضو کر کے تھوڑی دیر بعد پھر سے نمی سی محسوس ہوتی ہے، اس کے لئے کیا حکم ہے؟ کیا ایک وضو سے دو تین نمازیں پڑھ لیا کرے یا ہر بار نیا وضو کرنا ہو گا؟ اس کا عمرے کا بھی ارادہ ہے، وہاں واشروم بہت فاصلے پہ ہیں،ہر بار نیا وضو کرنا بہت مشکل ہو گا، آپ بتا دیں کہ اس کے لئے کیا حکم ہے؟

الجوابُ حامِدا ًو مُصلیِّا ً

صورتِ مسؤلہ میں مذکور خاتون کو آنے والے قطرات اور نمی اگر اندامِ نہانی کے اندرونی حصے سے خارج ہوتے ہوں تو وہ ناپاک ہیں ، جس کا حکم یہ ہے کہ مذکور عورت پر نماز پڑھنے کےلئے صرف وضو کرنا اور جسم یا کپڑوں پر لگی تری کو پاک کرنا ضروری ہے ، البتہ اگر اس نمی کا خروج اس قدر تسلسل کے ساتھ ہو کہ اسے اتنا وقفہ بھی نہ ملے کہ جس میں وہ وضو کرکے پاکی کی حالت میں وقت کی فرض نماز ادا کر سکے تو وہ معذور کے حکم میں ہو گی ، تفصیل اس حکم کی یہ ہے کہ مثلاً ادائیگئِ ظہر کے لئے وہ ظہر کے وقت میں اخیر وقت تک انتظار کرے ، اگر اس دوران اتنا وقت بھی نہ ملے کہ وہ کامل طہارت کے ساتھ ظہر کی نماز ادا کر سکے تو عصر کا وقت داخل ہونے سے قبل ظہر کے اخیر وقت میں وضو کر کے فقط فرض نماز ادا کرے ، اس کے بعد نمازِ عصر کی ادائیگی کے لئے پورا وقت انتظار کرنے کی ضرورت نہیں ، بلکہ نماز سے پہلے وضو کر کے نماز عصر ادا کرلے ، اس دوران اگر مذکور نمی خارج ہوتی بھی ہو تو تب بھی اس سے وضو نہیں ٹوٹے گا ، اسی طرح مغرب و عشاء میں بھی وہ ایسا ہی کرے ، کہ ہر نماز کے لئے الگ الگ وضو کر لیا کرے ، اس پورے وقت میں اگر اس کے علاوہ کوئی دوسرا ناقضِ وضو نہ پایا گیا ، تو مذکور عذر کے بار بار صادر ہونے سے اس کا وضو نہیں ٹوٹے گا ، البتہ اس دوران اگر پورا وقتِ نماز کوئی ایسا گزر جائے کہ اس پورے وقت میں اسے یہ عذر ایک مرتبہ بھی لاحق نہ ہو تو وہ شرعاً معذور نہیں رہے گی ، جبکہ عمرہ ادا کرتے وقت صرف طواف کے لئے طہارت شرط ہے ، اس لئے مذکور عذر کی بناء پر وقتی نماز کے لئے کیے گئے وضو کے ساتھ طواف بھی کر لیا کرے نماز کی طرح اس کے طواف بھی شرعاً درست ادا ہوں گے ۔

مأخَذُ الفَتوی

کما فی رد المحتار تحت: (قوله برطوبة الفرج) أی الداخل بدليل قوله أولج وأما رطوبة الفرج الخارج فطاهرة اتفاقا (الی قولہ) ومن وراء باطن الفرج فإنه نجس قطعا ككل خارج من الباطن الخ (باب الانجاس، ج 1، ص313، ط:سعید) ۔
وفی الدر المختار: (وصاحب عذر من به سلس) بول لا يمكنه إمساكه (أو استطلاق بطن أو انفلات ريح أو استحاضة) أو بعينه رمد أو عمش أو غرب، وكذا كل ما يخرج بوجع ولو من أذن وثدي وسرة (إن استوعب عذره تمام وقت صلاة مفروضة)بأن لا يجد في جميع وقتها زمنا يتوضأ ويصلي فيه خاليا عن الحدث (ولو حكما) لأن الانقطاع اليسير ملحق بالعدم (وهذا شرط) العذر (في حق الابتداء، وفي) حق (البقاء كفى وجوده في جزء من الوقت) ولو مرة (وفي) حق الزوال يشترط (استيعاب الانقطاع) تمام الوقت (حقيقة) لأنه الانقطاع الكامل(وحكمه الوضوء) لا غسل ثوبه ونحوه (لكل فرض) اللام للوقت كما في لدلوك الشمس (ثم يصلي) به (فيه فرضا ونفلا) فدخل الواجب بالأولى (فإذا خرج الوقت بطل) أي: ظهر حدثه السابق، حتى لو توضأ على الانقطاع ودام إلى خروجه لم يبطل بالخروج ما لم يطرأ حدث آخر أو يسيل كمسألة مسح خفه الخ (باب الحیض، ج 1، ص 305، ط:سعید)۔
و فی غنیۃ الناسک: و صاحب العذر الدائم اذا طاف اربعۃ اشواط ثم خرج الوقت توضأ و بنی و لاشیئ علیہ، و کذا اذا طاف اقل منھا الا ان الاعادۃ حینئذ افضل کما قدمنا اھ ( حکم نھایۃ وقت الصلوٰۃ فی طواف المعذور، ص 206، ط: المصباح) ۔