آئل ریسائیکل کرکے بیچنے والی ملازمت کا حکم

السلام علیکم !حضرت عرضی یہ ہے کہ آج کل ریسائکل انجن آئل کا کاروبار چل رہا ہےیعنی یہ پرانا اور خراب انجن آئل ہوتا ہے، جس کو ریسائکل کر کے باقاعدہ پیکنگ میں فروخت کیا جارہا ہے،پوچھنا یہ ہے کہ کیا اس طرح کے کاروبار سے یا اس طرح کی سیل جاب سے منسلک رہنا اور اس سے حاصل آمدنی جائز ہے یا نہیں؟ کیونکہ یہ پرانا جلا ہوا انجن آئل ہوتا ہے تو اس کو ریسائکل کیا جاتا ہے یعنی یہ مکمل طور پر ریفائن نہیں ہوتا،کیا اس طرح کے آئل سیل کی جاب یا اس طرح کے کاروبار کو کرنا جائز ہو گارہنمائی فرمائیں۔شکریہ

الجوابُ حامِدا ًو مُصلیِّا ً

صورت مسؤلہ میں اگر پرانےآئل کو صاف ریسائیکل اور پیکنگ کر کے نیا کہہ کر فروخت کیا جاتا ہو تو یہ عمل جھوٹ اور دھوکہ دہی پر مبنی عمل ہو نے کی وجہ سے شرعاً ناجائز اور حرام ہے ،لہذا خود اس طرح کا کاروبار کرنا اور جان بوجھ کر اس طرح کے دھوکہ دہی پر مبنی کاروبار سے منسلک رہنا درست نہیں جس سے اجتناب لازم ہے ، البتہ اگر آئل کو ریسائیکل کرنے کے بعد نیا اور Refinedکہہ کر نہ بیچا جا تا بلکہ خریدار اور کسٹمر کو آئل کی کوالٹی کے بارے میں علم ہو یا آئل پر اس طرح کی کوئی علامت یا تحریردرج ہے جس سے اس کا ریسائکل ہو نا واضح طور پر معلوم ہو رہا ہو ، تو ایسی صورت میں ریسائیکل آئل کی خرید فروخت میں شرعاً کوئی حرج نہیں بشرطیکہ کوئی اور وجہ عدم جواز کی نہ ہو ۔

مأخَذُ الفَتوی

کمافی مسند الامام أحمد بن حنبل: حَدَّثَنَا وَكِيعٌ قَالَ: سَمِعْتُ الْأَعْمَشَ قَالَ: حُدِّثْتُ عَنْ أَبِي أُمَامَةَ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: " يُطْبَعُ الْمُؤْمِنُ عَلَى الْخِلَالِ كُلِّهَا إِلَّا الْخِيَانَةَ وَالْكَذِبَ(ج36 ص504 رقم الحدیث22170 ط: مؤسسة الرسالة)
وفی درر الحكام في شرح مجلة الأحكام :الثمن المسمى هو الثمن الذي يسميه ويعينه العاقدان وقت البيع بالتراضي سواء كان مطابقا للقيمة الحقيقية أو ناقصا عنها أو زائدا عليها. ( المادة 153ج1ص 124)۔
وفی الفتاوى الهندية :ومن اشترى شيئا وأغلى في ثمنه فباعه مرابحة على ذلك جاز وقال أبو يوسف - رحمه الله تعالى - إذا زاد زيادة لا يتغابن الناس فيها فإني لا أحب أن يبيعه مرابحة حتى يبين. (3/ 161)۔