حیض کے ایام کا مدت سے زیادہ ہونے کی صورت میں نمازوں کا حکم

اگر کسی بہن کو اس کے آخری عام ماہواری کے دنوں کے بعد تقریباً (ڈیڑھ ماہ) 48 دنوں کے بعد حیض آئے جوکہ 15 دن تک جاری ہے،جبکہ بالغ ہونے کے بعد سے اس کی عام ماہواری کی مدت 5 دن ہے، یہ پہلی مرتبہ ہوا ہے کہ اسے اتنے لمبے عرصے کی ماہواری ہوئی ہے،کیا معمول کے دورانیہ کے بعد کی نمازیں جو چھوٹ گئی ہیں،انکی قضاء واجب ہے یا وہ تمام10 دن اس کی عام ماہواری میں شمار ہوتے ہیں؟عمر 43 سال۔

الجوابُ حامِدا ًو مُصلیِّا ً

واضح ہوکہ اگر کسی عورت کی ماہواری کی عادت متعین ہو، اور پھر کسی ماہ میں سابقہ عادت سے بڑھ کر دس دنوں سےبھی تجاوز کرجائے، تو اس عورت کی سابقہ عادت کے ایام کو حیض سمجھا جائے گا،اور بعد کے خون کو استحاضہ کا خون شمار کیا جائے گا، صورت مسئولہ میں چونکہ سائلہ کی سابقہ عادت 5 دن ہے، لہذا یہ پانچ دن تو حیض کے شمار ہونگے،البتہ باقی کے ایام استحاضہ کے شمار ہونگے، چنانچہ بقیہ دنوں کی نمازوں کی قضاء اس پر لازم ہوگی۔

مأخَذُ الفَتوی

کما فی فتح القدیر: (قوله ولو زاد الدم على عشرة أيام ولها عادة معروفة دونها ردت إلى أيام عادتها) فيكون الزائد على العادة استحاضة وإن كان داخل العشرة، وهل تترك بمجرد رؤيتها الزيادة؟ اختلف فيه، قيل لا إذا لم يتيقن بكونه حيضا لاحتمال الزيادة على العشرة الخ (ج1 صـ176 کتاب الطھارۃ باب الحیض ط: دارالفکر)۔
وفی الدر المختار: (ودم استحاضة) حكمه (كرعاف دائم) وقتا كاملا (لا يمنع صوما وصلاة) ولو نفلا (وجماعا) لحديث «توضئي وصلي وإن قطر الدم على الحصير» الخ (ج1 صـ298 کتاب الطھارۃ باب الحیض ط: سعید)۔