ڈینٹل بلر کی ملازمت کرنا

السلام علیکم ورحمتہ اللہ وبرکاتہ !کیا فرماتے ہیں مفتیان کرام اس مسئلہ کے بارے میں کہ امریکہ اور دیگر ممالک میں ہسپتال، مریض، ڈاکٹر انشورنس کے ساتھ منسلک ہوتے ہیں۔ ڈاکٹر جب کسی مریض کا علاج کرتے ہیں تو انہیں مریض کو فراہم کردہ خدمات، مریض کی متعلقہ انشورنس کمپنی کو بھیجنی ہوتی ہیں تاکہ انشورنس کمپنی مریض کو فراہم کردہ خدمات، علاج کے بدلے رقم ادا کرے۔ اب ڈاکٹر حضرات اپنی مصروفیات کی بناء پر مریض کی تمام تر معلومات انشورنس کمپنی کو خود نہیں بھیجتے بلکہ اس کے لیے کسی کل وقتی یا جزوقتی معاون کی خدمات حاصل کرتے ہیں۔ ایسے معاون کو میڈیکل یا ڈینٹل بلر (Medical / Dental Biller) کہا جاتا ہے،میڈیکل بلر کسی سافٹ وئیر میں مریض کی ساری معلومات بل کی شکل میں انشورنس کمپنی کو بھیجتا ہے، انشورنس کمپنی اگر کسی وجہ سے ایسے بل کو مسترد کر دے تو میڈیکل بلر، ایسے بل کی تصحیح کر کے انشورنس کو دوبارہ بھیجتا ہے اور اگر ضرورت پڑے تو ڈاکٹر کے معاون کے طور پر انشورنس کمپنی سے کال پر رابطہ کر کے معاملات / مسائل کو حل کرتا ہے،اب صورت مسئولہ میں رہنمائی درکار ہے کہ میرے لیے یہ کام کرنا (یعنی ڈاکٹر کے معاون کے طور پر انشورنس کمپنی کو مریض کا سارا ڈیٹا بھیجنا اور اس سے پیسوں کی وصولی یقینی بنانا) کیسا ہے؟ اور اس کمائی کا کیا حکم ہے؟جزاک اللہ خیراً کثیرا

الجوابُ حامِدا ًو مُصلیِّا ً

واضح ہو کہ کسی ہسپتال اور شفاء خانہ میں میڈکل بلر انشورنس کمپنی کا نمائندہ نہیں ہوتا، بلکہ وہ ہسپتال کا ملازم شمار ہوتا ہے، جس کی ذمہ داریوں میں سے ایک ذمہ داری ان مریضوں کی متعلقہ کمپنیوں سے تصدیق کے بعد ان کمپنیوں سے علاج معالجہ کے اخراجات کی وصولی کو یقینی بنانا ہوتا ہے، لہذا ہسپتال کے میڈیکل بلر کی اسامی پر ملازمت اختیا رکرنا جس میں بعض اوقات انشورنس کمپنیوں سے علاج معالجہ کے اخراجات بھی وصول کرنے پڑتے ہوں، جائز اور درست ہے شرعاً اس میں کوئی حرج نہیں۔(از تبویب)

مأخَذُ الفَتوی

کما قال اللہ تعالی: یٰۤاَیُّهَا الَّذِیْنَ اٰمَنُوْا كُلُوْا مِنْ طَیِّبٰتِ مَا رَزَقْنٰكُمْ الآیۃ(آیۃ 172 سورۃ البقرۃ)
وفی الدر المختار: وکل أنواع الکسب فی الإباحۃ سواء علی المذھب الصحیح کما فی البزازیۃ وغیرھا اھ (ج6 صـ 462 ط:سعید)
وفی رد المحتار: تحت (قولہ وجاز تعمیر کنیسۃ) قال فی الخانیۃ: ولو آجر نفسہ لیعمل فی الکنیسۃ ویعمرھا لابأس بہ لأنہ لا معصیۃ فی عین المال اھ (کتاب الحظر والإباحۃ فصل فی البیع ج6 صـ 391 ط:سعید)