میت کو غسل دینے کا طریقہ

میت کو غسل دینے کا طریقہ بتادیں۔ جزاک اللہ!

الجوابُ حامِدا ًو مُصلیِّا ً

میت کو غسل دینے کا مسنون طریقہ یہ ہے کہ جس تختہ پر غسل دیا جائے، اُس کو تین، پانچ یا سات دفعہ لوبان کی دھونی دیدو اور میت کو اُس پر اس طرح لٹاؤ کہ قبلہ اس کے دائیں جانب ہو ، اگر موقع نہ ہو اور کچھ مشکل ہو تو جس طرف چاہے لٹا دو ، پھر میت کے بدن کے کپڑے (کرتہ، شیروانی، بنیان وغیرہ) چاک کر لو اور ایک تہہ بند اس کے بستر پر ڈال کر اندر ہی اندر وہ کپڑے اتار لو ، یہ تہہ بند موٹے کپڑے کا ناف سے پنڈلی تک ہونا چاہیۓ، تاکہ بھیگنے کے بعداندر کا بدن نظر نہ آئے ۔
غسل شروع کرنے سے پہلے بائیں ہاتھ میں دستانہ پہن کر مٹی کے تین یا پانچ ڈھیلوں سے استنجاء کراؤ ، پھر پانی سے پاک کرو ،پھر وضو اس طرح کراؤ کہ نہ کلی کراؤ ، نہ ناک میں پانی ڈالو ، نہ گٹے (پہنچے) تک ہاتھ دھلاؤ، بلکہ روئی کا پھایا ترکر کے ہونٹوں، دانتوں اور مسوڑھوں پر پھیر کر پھینک دو ، اس طرح تین دفعہ کرو ، پھر اسی طرح ناک کے دونوں سوراخوں کو روئی کے پھائے سے صاف کرو ، لیکن اگر جنابت کی حالت میں موت واقع ہوئی ہو یا عورت کا انتقال حیض یا نفاس کی حالت میں ہوا ہو , تو منہ اور ناک میں پانی ڈالنا ضروری ہے، پانی ڈال کر کپڑے سے نکال لو ، پھر ناک منہ اور کانوں میں روئی رکھ دو ، تا کہ وضو اور غسل کراتے وقت پانی اندر نہ جائے، پھر منہ دھلاؤ ،پھر ہاتھ کہنیوں سمیت دھلاؤ ، پھر سر کا مسح کراؤ ، پھر تین دفعہ دونوں پاؤں دھوؤ ۔
جب وضو کرا چکو تو سر کو (اگر مرد ہے تو داڑھی کو بھی) خطمی یا کسی صابن وغیرہ سے جس سے صاف ہو جائے مل کر دھو دو ، پھر اسے بائیں کروٹ پر لٹا دو اور بیری کے پتوں میں پکا ہوا نیم گرم پانی یا خالص صاف ستھرا پانی دائیں کروٹ پر تین دفعہ سر سے پیر تک اتنا ڈالو کہ نیچے کی جانب بائیں کروٹ تک پہنچ جائے، پھر دائیں کروٹ پر لٹا کر اسی طرح سر سے پیر تک تین دفعہ اتنا پانی ڈالو کہ نیچے کی جانب دائیں کروٹ تک پہنچ جائے، اس کے بعد میت کو اپنے بدن سے ٹیک دیکر ذرا بٹھانے کے قریب کر دو اور اس کے پیٹ کو اوپر سے نیچے کی طرف آہستہ آہستہ مَلو اور دبادو , اگر کچھ فضلہ (پیشاب، پاخانہ وغیرہ) خارج ہو، صرف اُسی کو پونچھ کر دھو دو، وضو اور غسل دہرانے کی ضرورت نہیں، پھر اس کو بائیں کروٹ پر لٹا کر دائیں کروٹ پر کافور ملا ہوا پانی سر سے پاؤں تک تین دفعہ خوب بہا دو کہ نیچے بائیں کروٹ بھی خوب تر ہو جائے ، پھر دوسرا دستانہ پہن کر سارا بدن کسی کپڑے سے خشک کرکے تہہ بند دوسرا بدل دو ۔(ماخوز از احکام میت صفحہ نمبر ۶۵ تا ۶۷ )

مأخَذُ الفَتوی

کما فی الدر المختار : (و يوضع) كما مات (كما تيسر) في الأصح (على سرير مجمر وترا) (الى قوله) (و الكافور على مساجده) كرامة لها (2/ 194)-