خنزیر پر مشتمل فوڈ تیارکرنے والی کمپنی میں انجینئرنگ کی ملازمت کا حکم

السلام علیکم
میں انگلینڈ میں ۲۳سال سے رہائش پذیر ہوں اور انجینئر ہوں اور میری عمر ۵۴ سال ہے۔ میرا سوال میری جاب کے حوالے سے ہے۔ مجھے جاب کی آفر ہوئی ہے، جو ہر لحاظ سے مجھے suitable ہے۔ یہ میرے گھر کے قریب ہے(میں گھر سے بہت دور جاب کرتا ہوں اور ہر دوسرے ہفتے گھر آتا ہوں)۔ جاب کا package اور pay بھی اچھی ہے، کمپنی بھی بہت اچھی ہے اور مجھے بہت پسند آئی ہے۔ مسئلہ یہ ہے کے یہ فوڈکمپنی ہے اور اس میں باقی پروڈکٹس کے ساتھ سور(خنزیر) کے sausage rolls بھی بنتے ہیں۔ کیا ایسی فیکٹری میں کام کرنا جائز ہے اور تنخواہ حلال ہوگی؟ اگر میں یہ جاب قبول نہ کروں تو بے روز گار نہ ہوں گا، صرف گھر سے دور کچھ کم تنخواہ پہ جاب کر رہا ہوں، لیکن اچھا گزارہ ہو رہا ہے الحمدللہ۔ براہِ کرم رہنمائی فرمائیں کہ مجھے سور کے (sausage roll) بنانے والی فیکٹری میں جاب آفر قبول کرنی چاہیئے یا نہیں؟ جزاک اللّٰہ خیرا۔ میرا کام مشینوں کی ریپیئیر اور مینٹیننس ہو گا ۔ مشینوں کی دیکھ بھال بھی میرے جاب کا حصہ ہو گا۔ منیجمنٹ سے کوئی تعلق نہ ہو گا۔ براہِ مہربانی رہنمائی فرمائیں۔ جزاک اللہ

الجوابُ حامِدا ًو مُصلیِّا ً

واضح ہوکہ اگر مذکور فیکٹری میں سور سے بنی مصنوعات جیسے(sausage rolls)مستقل اور باقاعدہ طور پر تیار کی جاتی ہوں، اورسائل کی ذمہ داری انہی حرام مصنوعات کی تیاری میں استعمال ہونے والی مشینوں کی مرمت، مینٹیننس یا دیکھ بھال ہو ،تو یہ عمل حرام کام پر براہِ راست تعاون میں شمار ہوگا، اس بناءپر ایسی فیکٹری میں مینٹیننس انجینئر کی حیثیت سے کام کرناشرعاً جائز نہیں،جس سے احترازلازم ہے،تاہم اگرمذکورمشینوں کاکام عمومی نوعیت کاہوجس میں حلال حرام ہرقسم کے فوڈ آئٹم تیارکیے جاتے ہوں تواس صورت میں اگرچہ سائل کے لیے ایسی فیکٹری میں بطورمینٹیننس انجینئرملازمت اختیارکرنے کی گنجائش ہے مگراس کے باوجوداس ملازمت سے حاصل ہونے والی تنخواہ شبہ حرام سے خالی نہ ہوگی ۔ چونکہ سائل کے پاس حلال متبادل ملازمت موجود ہے اورخصوصاً وہ اس ملازمت کے بغیر بھی بے روزگار نہیں ہوگا(اگرچہ موجودہ نوکری تنخواہ میں کچھ کم اور گھر سے دور ہے)،لہٰذاایسی صورت میں سائل کے لیے حرام یا مشتبہ ذریعۂ معاش اختیارکرنے کے بجائے حلال پر قناعت اختیار کرنا افضل اورمطلوب ہے، اوریہی تقویٰ کاتقاضا بھی ہے۔

مأخَذُ الفَتوی

کما فی القرآن المجید: (وتعاونوعلى البر والتقوى ولا تعاونوا على الإثم والعدوان واتقوا الله إِنّ اللّه شديد العقاب)۔ الآیۃ (سورۃ المائدة، آیت نمبر:2)۔
وفیہ أیضاً: (حرّمت علَيكم الْميْتة والدم ولحْم الْخنزير وما أهلّ لغيْر اللّه به)۔ الآیۃ(سورۃ المائدة، آیت نمبر:3)۔
وفی أحکام القرآن للجصاص: وقوله تعالى(وتعاونوا على البر والتقوى) يقتضي ظاهره إيجاب التعاون على كل ما كان تعالى لأن البر هو طاعات الله وقوله تعالى(ولا تعاونوا على الإثم والعدوان) نھي عن معاونة غيرنا على معاصي الله تعالى إلخ۔ (سورة المائدة،الآية:3 ،ج:3، ص:296، ط:دار إحياء التراث العربي)۔
وفی فقہ البیوع: اما قبول الوظائف فی مثل ھذہ الفنادق والمطاعم،فان کانت الوظیفۃ متمحضۃ لخدمۃ مباحۃ، فھی جائزۃ، وتجری علی راتبھا حکم المال الحلال، وان کانت متمحضۃ للحرام، مثل بیع الخمر ، فھی حرام، وراتبھا حرام الخ۔(حکم الفنادق و المطاعم التی تباع فیھا الخمور، ج2، ص1056، ط: معارف القرآن)۔
وفی بذل المجھود: ومتفق عليه أن كل اُجرة تكون علی فعل المعصية تكون حراما إلخ۔ (کتاب الإجارۃ، باب فی کسب الحجام، ج 11، ص 129، ط: دار البشائر)۔
وفی الدر المختار: وما كان سببا لمحظور فھو محظور إلخ۔ (كتاب الحظر والإباحة،ج:6،ص:350،ط:دار الفکر)۔