حیض کے ایام میں خون نہ آنے کی وجہ سے ازدواجی تعلق قائم کرنے کا حکم

السلام علیکم!
میرا سوال یہ ہے کہ میری بیوی کو ایک سال سے زیادہ عرصے تک ہر تین ماہ بعد حمل روکنے کے لیے برتھ کنٹرول کا انجیکشن لگتا رہا۔ اب پچھلے مہینے اسے انجیکشن نہیں لگایا گیا، تو پیشاب کرتے وقت خون کے لوتھڑے (کلاٹس) آ رہے ہیں۔ اس نے پیڈ بھی لگایا ہوا ہے، لیکن وہ بالکل صاف ہے، اس پر خون کا کوئی نشان نہیں آیا۔ گزشتہ 48 گھنٹوں سے یہی صورتِ حال ہے۔
تو کیا یہ اس کے حیض شمار ہوں گے یا نہیں؟ اور اس حالت میں کیا ہم دونوں آپس میں ازدواجی تعلق قائم کر سکتے ہیں یا نہیں؟ ڈیڑھ سال سے اسے حیض نہیں آئے، اس لیے حیض کے چکر (سائیکل) کا بھی معلوم نہیں ہو رہا۔ براہِ کرم رہنمائی فرمائیں۔

الجوابُ حامِدا ًو مُصلیِّا ً

صورتِ مسئولہ میں اگر مذکورہ خون کے لوتھڑے مقامِ حیض سے آ رہے ہوں اور یہ کیفیت مسلسل کم از کم تین دن (72 گھنٹے) تک برقرار رہے، تو یہ حیض شمار ہوگا، اگرچہ خون صرف پیشاب کے وقت ظاہر ہوتا ہو۔ ایسی صورت میں جب تک پاکی حاصل نہ ہو، میاں بیوی کے لیے ازدواجی تعلق قائم کرنا جائز نہیں، اس سے اجتناب لازم ہے۔

مأخَذُ الفَتوی

کما فی المحيط البرهاني في الفقه النعماني: وشرعاً: اسم لدم دون دم، فإنها: اسم لدم خارج من رحم المرأة، فأما الخارج من فرج المرأة دون الرحم فهو استحاضة وليس بحيض شرعاً، الدليل عليه ما روي أن فاطمة بنت حبيش سألت رسول الله صلى الله عليه وسلّموقالت: «إني امرأة أستحاض فلا أطهر الشهر والشهرين فقال عليه السلام: ليس تلك بالحيضة إنما هي دم عرق انقطع فإذا أجليت الحيضة فدعي الصلاة أيام أقرائك ثم اغتسلي وتوضئي لكل صلاة». (1/ 208)
وفی مراقی الفلاح: أقل ‌الحيض ثلاثة وأكثره عشرة وأقل ما بين الحيضتين خمسة عشر يومًا و لا حد لأكثره" لأنه قد يمتد أكثر من سنة. (باب الحیض والنفاس،61،المكتبة العصرية)