معتادہ حیض کی ترتیب خراب ہونے سے پاکی کے ایام کیسے شمار کرے؟

پچیس جون کے شام کے وقت خون آیا تھا اور چار جولائی کو ختم ہوا تھا اور آج پھر سے اٹھارہ جولائی کے رات کے وقت خون آیا ہے اس کو کیا حیض میں شمار کیا جائے یا استحاضہ میں ؟اور یاد رہے عادتِ سابقہ دس دن ہے اور پہلے مہینے سے عادت بھی اور حیض کا ترتیب بھی صحیح نہیں ،اس صورت حال میں کیا حکم ہے مفتیانِ عظام کیا فتویٰ دیتےہیں؟ جواب دیجیے ۔شکریہ

الجوابُ حامِدا ًو مُصلیِّا ً

سوال میں عادتِ سابقہ سے مراد اگر یہ ہے کہ پچھلی دفعہ حیض 10 دن آیا تھا تو صورتِ مسئولہ میں 18 جولائی کو آنے والا خون چونکہ مدتِ طہر کی اقل مدت کے اندر اندر آیا ہے یعنی15 دن سے کم آیا ہے اس لئے یہ طہرِ فاسد اور دمِ متصل (مسلسل خون جاری رہنے )کے حکم میں ہوگا۔ یعنی سائلہ 5 جولائی تک پورے 10 دن حائضہ شمار ہوگی اور اب 18 جولائی کو آنے والا خون استحاضہ شمار ہوگا، چنانچہ وہ نماز اور دیگر عبادات بجا لائے گی۔

مأخَذُ الفَتوی

کما فی البحر الرائق: فالأصل عند أبي يوسف وهو قول أبي حنيفة الآخر على ما في المبسوط أن الطهر المتخلل بين الدمين إذا كان أقل من خمسة عشر يوما لا يصير فاصلا بل يجعل كالدم المتوالي؛ لأنه لا يصلح للفصل بين الحيضتين فلا يصلح للفصل بين الدمين الخ ( كتاب الطهارة،باب الحيض ج 1ص216 ط: دار الکتب الإسلامي)۔
و فی الشامیۃ:تحت(قوله والزائد على أكثره) أي في حق المبتدأة، أما المعتادة فما زاد على عادتها ويجاوز العشرة في الحيض والأربعين في النفاس يكون استحاضة كما أشار إليه بقوله أو على العادة إلخ. أما إذا لم يتجاوز الأكثر فيهما، فهو انتقال للعادة فيهما، فيكون حيضا ونفاسا رحمتي الخ (باب الحیض ج:1 ص:285 ط: سعید)۔