نبی اکرم صلی اللہ علیہ و سلم کی منقبت میں کہے گئے شعر ’’اَکھیاں ماہی دیا شرابی‘‘ کا مطلب

میں نے کل منقبت سنی: امّان نی امّاں گھر رانجھن آیا رانجھن میرا پُھل گُلابی اَکھیاں ماہی دیا شرابی
مفتی صاحب! کیا یہ آخری لائن غلط نہیں ہے ؟ کیا یہ حضورﷺ کے بےادبی نہیں ہے؟ کہ میں نے یہ کلام طاہر القادری صاحب کی آواز میں بھی سنا ہے۔ برائے مہربانی میرے سوال کا جواب لازمی دیں تاکہ اگر میں غلط ہوں تو میری اصلاح ہو سکے۔

الجوابُ حامِدا ًو مُصلیِّا ً

دنیا میں جتنی بھی زبانیں رائج ہیں ہر زبان کے کچھ نہ کچھ خاص اصطلاحات ومحاورات ہوتے ہیں کہ جن کے اصل مفہوم ومدعیٰ سے اہلِ زبان ہی واقف ہوتے ہیں۔ اب چونکہ مذکورہ منقبت پنجابی زبان میں ہے اور پنجابی بولنے والے حضرات کا کہنا ہے کہ جب کسی کی آنکھوں کی خوبصورتی بیان کرنا مقصود ہو تو اس وقت اس قسم کے الفاظ استعمال کیے جاتے ہیں یہ ہرگز مراد نہیں ہوتی کہ اس نے شراب پی ہے،اگر ایسا ہی ہو تو بظاہر اس میں کوئی بے ادبی نہیں۔