حضرت فاطمہ۔رضی اللہ عنہا۔تذکرے کے وقت کچھ مبھم الفاظ استعمال کرنے والے پر رافضی کا حکم لگانا

جناب مفتی صاحب السلام علیکم!
سلام کے بعد عرض ہے کہ ایک شخص جس کا تعلق اہلسنت و جماعت سے ہے اس نے حضرت فاطمہ سلام اللہ علیہا کے بارے میں سوشل میڈیا پر یہ الفاظ لکھے " جو نام نہاد پیر اور مولوی خاموش ہیں تو یقین جانیئے جب روز محشر ان کے معاملے میں بھی ان معصومین نے سکوت اختیار کیا توانہیں نانی یاد آجائے گی۔" موصوف نے صرف یہی لفظ استعمال کیا ہے اور کہیں بھی تحریری یا زبانی کچھ نہیں کہا ہے۔
برائے مہربانی اس شخص کے بارے میں رہنمائی فرمائیں جب کہ کہنے والا حافظ کہہ رہا ہے کہ اس نے یہ لفظ عرف عام میں استعمال ہونے والے معنی میں استعمال کیا ہے ؟ کچھ لوگ کہتے ہیں وہ یہ الفاظ کہہ کر رافضی ہو گیا ہے اور کچھ اس سے انکار کرتے ہیں کہ اس نے معصوم عن الخطا نہ کہا ہے اور لفظ معصوم عرف عام میں استعمال ہوتا ہے جس کے معنی بے گناہ کے لیے جاتے ہیں؟ جواب سے نواز کر شکریہ کا موقع دیں ؟

الجوابُ حامِدا ًو مُصلیِّا ً

مذکور الفاظ تحریر کرنے والا شخص جب از خود اقرار اور حلفاً وضاحت دے رہا ہے، کہ مذکور الفاظ سے میرا مقصد اور ارادہ فقط وہ تھا جو عرف عام میں لیا جاتا ہے ، اس کے علاوہ میرا کوئی مقصد نہیں تھا، اس کے باوجود اسے رافضی قرار دینا قطعاً درست نہیں، تاہم مذکور شخص کے لیے ایسے کلمات لکھنا جو لوگوں کے درمیان تشویش اور شک و شبہ کا باعث ہو درست نہیں جس سے آئندہ کے لیے اجتناب کرنا چاہیے۔واللہ اعلم بالصواب