جعلی سرٹیفکیٹ پر ملنے والی ملازمت کا حکم

السلام علیکم و رحمۃ اللہ و برکاتہ!
کیا فرماتے ہیں مفتیانِ کرام اس مسئلہ کے بارے میں کہ میں گزشتہ 12سالوں سے گریجویشن کا طالبِ علم ہوں ، بار ہا کوشش کے باوجود مجھے کسی نہ کسی وجہ سے فیل کر دیا جاتا ہے ، سالانہ اور ضمنی دونوں امتحانات میں۔
اب عرض یہ ہے کہ چونکہ میرا گریجویشن نا مکمل ہے جس کی وجہ سے مجھے مناسب ملازمت میسر نہیں ، اگر میں جعلی گریجویشن سرٹیفکیٹ بنا لوں تو کسی درجہ مجھے اچھی ملازمت میسر ہوگی اور اسی جعلی سرٹیفکیٹ پر جو معاوضہ ملے گا کیا میرے لئے وہ استعمال کرنا حلال ہو گا ؟براہِ کرم رہنمائی فرمائیں۔

الجوابُ حامِدا ًو مُصلیِّا ً

سائل کیلئےدھوکہ دہی اور جعلسازی کے ذریعے غیر قانونی طور پر جعلی گریجویشن سرٹیفیکیٹ کا حاصل کرنا شرعاً جائز نہیں،جس سے سائل کو اجتناب اور جائز طریقہ سے کوئی حلال ذریعۂ آمدن تلاش کرنے کا اہتمام کرنا چاہیئے، تاہم اگر سائل نے ایسا کرلیا اور اس کی بنیاد پر سائل کو کوئی جائز ملازمت ملی اور سائل میں اس ملازمت کی اہلیت اور استعداد موجود ہو اور دورانِ ملازمت مفوضہ امور کی انجام وہی دیانت داری کے ساتھ ادا کرتا ہو تو ایسی صورت میں اس ملازمت سے حاصل شدہ رقم سائل کیلئے حرام نہ ہوگی۔

مأخَذُ الفَتوی

کما قال اللہ تعالی: وَ تَعَاوَنُوْا عَلَى الْبِرِّ وَ التَّقْوٰى وَ لَا تَعَاوَنُوْا عَلَى الْاِثْمِ وَ الْعُدْوَانِ الآیۃ (آیت 2 سورۃ المائدۃ)
وفی مسند أحمد: عن أبی ھریرۃ رضی اللہ عنہ، أن رسول اللہ ﷺ قال: من حمل علینا السلاح فلیس منا، ومن غشنا فلیس منا (15/232)
وفی رد المحتار: تحت (قولہ لأن الغش حرام) ذکر فی البحر (إلی قولہ) إذا باع سلعۃ معینۃ، علیہ البیان وإن لم یبین قال بعض مشایخنا یفسق وترد شھادتہ الخ (کتاب البیوع ج 5 صـ 47 ط: سعید)