ٹی وی چینل میں بطور ٹیکنکل انجینئر ملازمت کا حکم

السلام علیکم ورحمۃ اللہ وبرکاتہ ! کیا فرماتے ہیں مفتیانِ کرام اس مسئلہ کے بارے میں کہ میں عرب کے ایک مشہور TV چینل میں بطور ٹیکنکل انجینئر اپنے فرائض دے رہا ہوں،میرا کام tv نشریات کو سٹیلائٹ کے ذریعے لوگوں کے گھروں تک پہنچانا ہے، tv چینل پر بعض اوقات موسیقی کے پروگرام گانے باجے یا عورتوں کو بنا پردے کے بھی دکھایا جاتا ہے، براہِ راست میرا اس سے کوئی تعلق نہیں، کیونکہ میرا کام صرف تکنیکی امور کو دیکھنا ہے، براہ ِکرم رہنمائی فرمائیں ایسی جاب میرے لیے کیسی ہے یا ایسی کمائی میرے لیے کیسی ہے؟ میرے 2 بچے اور ایک بیگم ہے انکا سارا خرچہ بھی میرے ذمّہ ہے۔ براہ کرم رہنمائی فرمائیں ۔ جزاک اللہ ۔

الجوابُ حامِدا ًو مُصلیِّا ً

واضح ہو کہ ٹی وی چینل پر نشر ہونے والے پروگرامز جائز اور ناجائز دونوں طرح ہوتے ہیں، اس لیے سائل کیلئے مذکور ملازمت جاری رکھنے کی اگرچہ گنجائش معلوم ہوتی ہے اور اس کی کمائی کو حرام نہیں کہا جاسکتا ، لیکن آج کل عام طور پر اس کا ناجائز استعمال زیادہ ہے ، اس لیے سائل کو چاہیے کہ مذکور ملازمت مستقل جاری رکھنے کے بجائے جلد از جلد کوئی اور جائز ذریعہ آمدن تلاش کرے ، تاہم بمجبوری مذکور ملازمت جاری رکھنے کی بھی گنجائش ہے ۔

مأخَذُ الفَتوی

کما قال اللہ تعالی: یٰۤاَیُّهَا الَّذِیْنَ اٰمَنُوْا كُلُوْا مِنْ طَیِّبٰتِ مَا رَزَقْنٰكُمْ الآیۃ(آیۃ 172 سورۃ البقرۃ)
وفی الدر المختار: وکل أنواع الکسب فی الإباحۃ سواء علی المذھب الصحیح کما فی البزازیۃ وغیرھا اھ (ج6 صـ 462 ط:سعید)
وفی رد المحتار: تحت (قولہ وجاز تعمیر کنیسۃ) قال فی الخانیۃ: ولو آجر نفسہ لیعمل فی الکنیسۃ ویعمرھا لابأس بہ لأنہ لا معصیۃ فی عین المال اھ (کتاب الحظر والإباحۃ فصل فی البیع ج6 صـ 391 ط:سعید)