Ruling on provident fund

میں ایک گورنمنٹ ملازم ہوں ہمارے محکمے میں ڈی ایس پی فنڈ کے ذریعے ہماری تنخواہ میں پیسے ہر ماہ جمع ہوتے ہیں،جب وہ ایک لاکھ یا اس سےزیادہ ہوجاتےہیں تو اس پر پندرہ سے بیس ہزار ہر سال بڑھتے ہیں، یہ عمل کیسا ہے؟

الجوابُ حامِدا ًو مُصلیِّا ً

ڈی ایس پی فنڈ کی دو قسمیں ہیں ۔ (۱) جبری (۲) اختیاری-
جبری ڈی ایس پی فنڈ میں ملازم کی تنخواہ سے جو رقم ماہ بماہ کاٹی جاتی ہے ، اور اس پر ہر ماہ جو اضافہ محکمہ اپنی طرف سے کرتا ہے، پھر مجموعہ پر جو رقم سالانہ بنام سود جمع کرتا ہے، ان تینوں رقموں کا حکم ایک ہی ہے اور وہ یہ کہ یہ سب رقمیں در حقیقت تنخواہ ہی کا حصہ ہیں، اگر چہ وہ سود یا کسی اور نام سے دی جائیں ،لہذا ملازم کے لیے ان کو لینا اور اپنے استعمال میں لانا جائز اور درست ہے۔
جبکہ ڈی ایس پی فنڈ کی دوسری قسم اختیاری ہے، جس کو ملازم اپنی مرضی اور اختیار سے کٹواتا ہے، اس پر جور قم محکمہ بنام سود دےگا، اس کا لینا اور اپنے استعمال میں لانا جائز نہیں، اس سے اجتناب لازم ہے۔
اس دوسری قسم میں چونکہ تشبہ بالربا کے ساتھ سود خوری کا ذریعہ بنا لینے کا خطرہ بھی ہے ، اس لئے اس رقم کو وصول ہی نہ کیا جائے یا وصول کر کے بغیر نیت ثواب کسی مستحق زکوۃ کو صدقہ کر دیا جائے۔

مأخَذُ الفَتوی

كما فی البحر الرائق: (قوله والأجرة لا تملك بالعقد) (الى قوله) (قوله بل بالتعجيل أو بشرطه أو بالاستيفاء أو بالتمكن) يعني لا يملك الأجرة إلا بواحد من هذه الأربعة والمراد أنه لا يستحقها المؤجر إلا بذلك كما أشار إليه القدوري الخ(ج7،ص300،ط: دار الكتاب الإسلامي)۔