کیا دنیا کے کاموں میں کسی دوسرے شخص سے مدد مانگنا بھی شرک ہے؟

السلام علیکم ! ڈاکٹر اسرار صاحب کے ایک لیکچر میں بیان کیا گیا کہ حاجت روا صرف اللہ کی ذات ہے ،بالکل درست کہ کسی غیر کو حاجت روا سمجھا تو شرک کیا ،آگے انھوں نے کہا کہ دنیاوی کاموں میں کسی کو مدد کے لیے کہنا بھی شرک ہے ،مگر اتنی گنجائش ہے کہ ایک دفعہ مدد کے لیے پکار لیا جاے، اب سوال یہ ہے کہ ایک مقدمہ پیش آگیا تو بار بار مدد کے لیےوکیلوں کو بلانا اور جائز حق کے حصول کے لیے سفارش بھی کرانی پڑتی ہے تو کیا یہ سب ہی شرک میں آ گیا؟ اسی طرح ہسپتال میں داخل مریض بار بار مدد کے لیے پکارتے ہیں تو یہ سب کیا کہا جائے گا؟ اگر چہ یہ عقیدہ رکھا جائے کہ اللہ پاک کی منشاء کے بغیر کچھ نہیں ہو سکتا تو پھر درست ہو گا؟

الجوابُ حامِدا ًو مُصلیِّا ً

سائل نے ڈاکٹر اسرار صاحب مرحوم کے جس لیکچر کا حوالہ دیا ہے، اس کے سیاق و سباق اور ان کی گفتگو کس پیرائے میں کی گئی تھی، اس متعلق چونکہ ہمیں علم نہیں ، اس لیے ان کے مذکور بیان کے اقتباس پر کوئی تبصرہ کرنا ممکن نہیں ،البتہ اصولی طور پر یہ بات سمجھنا ضروری ہے کہ ہروہ کام جو انسان کے اختیار میں ہو (جیساکہ روز مرہ کے کام کاج ہوتے ہیں) اس میں انسانوں سے مدد اور تعاون مانگنا شرک نہیں ،بلکہ بلا شبہ جائز اور درست ہے، اسی طرح طبیب کو علاج کیلئے بلانا، اور وکیل کو مقدمات کے حل کیلئے بلانا درست ہے، تاہم ما فوق الاسباب امور میں کسی انسان کو مددگار ، قادرِ مطلق ،حاجت روا ،مختارِ کل سمجھ کر اُس سے مدد مانگنا شرک ہے جس سے اجتناب لازم ہے۔