دھوکہ دہی سے پیسے کمانے والے ادارہ میں ملازمت کا حکم

میں ایک پاکستانی آئی ٹی کمپنی/کال سینٹر میں بطور سی ایف او (CFO) کام کرتا ہوں (نائٹ شفٹ: رات 9 بجے سے صبح 6 بجے تک)۔ مجھے امریکی بینکوں کو کال کر کے اپنے یو ایس ڈائریکٹرز بن کر بات کرنی پڑتی ہے (ان کی اجازت سے) تاکہ بینکنگ کے مسائل حل کیے جا سکیں۔ مجھے یہ شک بھی ہے کہ یہ کمپنی امریکی شہریوں کے ساتھ فراڈ کر رہی ہے، کیونکہ روزانہ چارج بیکس (chargebacks) آتے ہیں جہاں امریکی شہری اپنے بینکوں کو شکایت کرتے ہیں کہ ان کے کارڈ سے غیر قانونی کٹوتی ہوئی ہے۔ میرا سی ای او کہتا ہے کہ کلائنٹ ہمارے ساتھ فراڈ کر رہا ہے اور سروسز لینے کے بعد پیسے واپس لے رہا ہے۔ میرا سوال یہ ہے کہ کیا یہ میری ذمہ داری ہے کہ میں چیک کروں کہ ہم واقعی امریکی شہریوں کو لوٹ رہے ہیں، یا مجھے صرف اپنے کام (وینڈر پیمنٹس، پے رول، بک کیپنگ وغیرہ) پر توجہ دینی چاہیے؟

الجوابُ حامِدا ًو مُصلیِّا ً

صورتِ مسئولہ میں امریکی بینکوں سے رابطہ کرتے وقت اپنے آپ کو کمپنی کے یو ایس ڈائریکٹر کے طور پر متعارف کرانا، اگر حقیقت کے خلاف ہو، تو شرعاً جھوٹ اور دھوکے کے زمرے میں آتا ہے، اگرچہ متعلقہ ڈائریکٹر نے اس کی اجازت دی ہو، لہٰذا اس سے اجتناب لازم ہے۔
نیز اگر ملازم کو اپنے ادارے کے متعلق قوی شبہ یا قرائن موجود ہوں کہ وہ لوگوں کے ساتھ فراڈ یا ناجائز مالی معاملات میں ملوث ہے، تو اس کے لیے صرف اپنے محدود دفتری کام کا عذر کافی نہیں، بلکہ حتیٰ الامکان حقیقت کی تحقیق کرنا ضروری ہے۔ اگر تحقیق کے بعد یہ ثابت ہوجائے کہ ادارہ واقعی دھوکہ دہی اور ناجائز طریقے سے لوگوں کا مال حاصل کر رہا ہےجس میں سائل کی معاونت بھی شامل ہے،تو سائل کے لئے، ایسی ملازمت شرعاًناجائزاوراس کی آمدنی بھی حلال نہ ہوگی ،چنانچہ اس کوترک کرکے جائزذریعہ معاش اختیارکرنالازم ہوگا۔

مأخَذُ الفَتوی

کما رویٰ ابن حبان فی صحیحہ: عن عبد الله، قال: قال رسول الله صلى الله عليه وسلم: "من غشنا فليس منا، والمكر، والخداع في النار".(النوع الرابع والثمانون: ذكر الزجر عن أن يمكر المرء أخاه المسلم، أو يخادعه في أسبابه.، ج:3 ، ص:422،ط:دار ابن حزم)