’’نیاز‘‘ کی شرعی حیثیت

میری ایک دوست ہے ، اس نے مجھے کہا کہ پوچھ کے بتاؤ کہ ''نیاز''کیا ہوتی ہے؟ شرعی کوئی حیثیت ہے اس کی یا بدعت ہے ؟ میں الحمد للہ دیوبندی مسلک سے تعلق رکھتی ہوں،پر خود کو اپنی دوست کے جواب دینے کا اہل نہیں پاتی ،براہ مہربانی اس سلسلے میں رہنمائی فرمائیں ۔

الجوابُ حامِدا ًو مُصلیِّا ً

''نیاز'' عرفِ عام میں ایصال ثواب کیلیے کوئی کھانا وغیرہ دینے کو بولا جاتا ہے اور اللہ تعالیٰ کے نام پر اس غرض سے غرباءوفقراء میں کو ئی چیز تقسیم کرنا بلاشبہ جائز اور قربت کا ذریعہ ہے،مگر یہ کا م غیر اللہ کے نام کرنا جیسا کہ بعض جاہل لوگ اور اہل تشیع کرتے ہیں، حرام ہے ، یا اس کیلیے مخصوص ایام کی تعیین کرنا اور خاص طریقے وضع کرنا جس کا شریعتِ مطہرہ نے پابند نہیں کیا، جیسا کہ اہل بدعت کرتے ہیں، جائز نہیں، اس سے احتراز لازم ہے ۔

مأخَذُ الفَتوی

ففی الدر المختار: واعلم أن النذر الذي يقع للأموات من أكثر العوام وما يؤخذ من الدراهم والشمع والزيت ونحوها إلى ضرائح الأولياء الكرام تقربا إليهم فهو بالإجماع باطل وحرام ما لم يقصدوا صرفها لفقراء الأنام وقد ابتلي الناس بذلك - (2 / 439) واللہ أعلم بالصواب