ایجاب و قبول کے بغیر منگنی کی شرعی حیثیت

میرے والدین پرپوزل لے کر لڑکی کے گھر گئے ، وہ اپنی بیٹی کو دینے کے لیے تیار تھے اس لئے فیملی ہمارے گھر دیکھنے آئی اور ہم سے ملاقات کی , ہم رشتہ دار ہیں ,پھر لڑکی کے والدین نے ہمیں فون کیا کہ وہ ہمیں پسند کرتے ہیں اور پرپوزل قبول کرتے ہوئے انہوں نے ہمیں اپنے گھر دعا کے لئے آنے کی دعوت دی , اس کے بعد، ہماری منگنی کی تقریب تھی ، اور میرے پورے خاندان نے شرکت کی , تمام گھر والے اکٹھے ہوئے ، مہر کا فیصلہ کیا ، شادی کب ہوگی ، اور ہمارے مستقبل کے لیے دعا کی , میری ماں نے لڑکی کو انگوٹھی پہنائی , لیگل اسٹامپ پیپر لکھا ,میں اور خاندان کے دیگر 3 افراد نے اس پر دستخط کیے , میں نے بہت سے فتوے پڑھے کہ اگر دو آدمیوں کے سامنے مہر کا فیصلہ کر کے ایک دوسرے کو قبو ل کہہ دو تو یہ نکاح صحیح ہے , جیسا کہ نکاح میں دو مرد گواہ اور مہر کی ضرورت ہے , تو یہاں ہمارا پورا خاندان موجود تھا میرے والدین ، لڑکی کے والدین ، تقریباً 15 مرد اور خواتین (میرے بغیر) اور مہر کا فیصلہ ہوا ، شادی کا سال طے ہوا اور اسٹامپ پیپر پر بھی لکھا گیا , اب میرے نام کے ساتھ لڑکی کا نام لیا جاتا ہے , تمام معاشرہ اور خاندان جانتے ہیں کہ وہ ہماری ہے ,ان سب میں نکاح یا قبول کا لفظ استعمال یا تبادلہ نہیں ہوا , نیتوں کو دیکھیں تو ہمارے والدین نے ہمیں قبول کیا ، مہر کا فیصلہ کیا ، شادی کا وقت طے کیا ، ہمارے مستقبل کے لئے دعائیں کیں ، سب کو بتا دیا , کیا یہ نکاح ہے؟ اور کیا جائز ہے ؟ شکریہ

الجوابُ حامِدا ًو مُصلیِّا ً

صورتِ مسئولہ میں مذکور رسم محض منگنی کی حد تک تو درست ہے ، لیکن اس میں باقاعدہ ایجاب و قبول کا کوئی تذکرہ نہیں، اس لئے محض اس رسم کو نکاح سمجھ کر لڑکا لڑکی شرعاً میاں بیوی نہیں کہلائیں گے ، البتہ سائل نے جس اسٹام پیپر پر دستخط کا تذکرہ کیاہے، اس میں کیا لکھاتھا ؟ اور اس پر کن کن لوگوں کے دستخظ ہیں ، وہ تحریردیکھ کر ہی اس بارے میں کوئی شرعی رائے دی جاسکتی ہے , باقی سائل اس تمہید سے کیا پوچھنا چاہ رہا ہے ، اور اصل مسئلہ کیاہے؟ اس کے لئے بہتریہ ہےکہ سائل وہ اسٹام پیپر لیکر کسی قریبی دارالافتاء حاضرہوکر پوری صورتِ حال بیان کرکے حکمِ شرعی معلوم کرلے۔