”اب تو چیخی تو تجھے تیسری طلاق ہے “ ان الفاظ کاحکم

میری شادی کو تین سال تین مہینے ہوئے ہیں، اور میرے دو بیٹے ہیں ، میری بیوی کو دو طلاقیں ہو چکی ہیں ، اور ۲۳ فروری ۲۰۱۹ کوایک جھگڑے میں , میں نے اسے ڈرانے کے لئے کہا کہ ”اب تو چیخی تو تجھے تیسری طلاق ہے “جسے سن کے وہ چپ ہو گئی ، گویا اس نے اس موقع پر میری بات مان لی ، اس کے کچھ دیر بعد وہ دوبارہ بولنا شروع ہوئی جسے میں سمجھ رہا تھا کہ وہ چیخ رہی ہے، لیکن وہ کہتی ہے کہ میں چیخی نہیں صرف اونچا بولی، میں سمجھا کہ طلاق واقع ہو گئی ہے، تو میں نے گھر بات کی کہ میری طرف سے فارغ ہوچکی ہے ، میری نیت طلاق دینے کی نہیں تھی صرف مقصد اسے چپ کرنا تھا جو وہ اس وقت ہو گئی، آیا کیا طلاق واقع ہوئی یا نہیں ؟

الجوابُ حامِدا ًو مُصلیِّا ً

چیخنا عرف میں عام معمول کے غصہ سے زیادہ اونچی آواز میں بولنے کو کہتے ہیں ، اس لئے ۲۳ فروری ۲۰۱۹ کو جھگڑے کے موقع پر شوہر نے بیوی کو وقتی طور پر چپ کرانے کے لئے یہ الفاظ استعمال کیے کہ " اب اگر تو چیخی تو تجھے تیسری طلاق ہے " اور ان الفاظ کے بعد بیوی فی الوقت خاموش بھی ہو گئی , بعد میں اگر چہ اس نے اونچی آواز میں دوبارہ بولنا شروع کر دیا ہو جس کے چیخ ہونے میں بھی شک ہے تواس صورت میں وقوعِ طلاق کے مفروضہ پر شوہر کا مذکور الفاظ کہ "میری طرف سے فارغ ہوچکی ہے" استعمال کرنے سے بھی اس کی بیوی پر تیسری طلاق واقع نہ ہو گی۔

مأخَذُ الفَتوی

کمافی البدائع الصنائع: وأما بيان ركن الطلاق هو اللفظ الذي جعل دلالة على معنى الطلاق (الی قوله ) وأما الذي يقوم مقام اللفظ فالكتابة والإشارة.(3/99)
وفی الدرالمختار: (شرطه الملك) حقيقة كقوله لقنه: إن فعلت كذا فأنت حر أو حكما، ولو حكما (كقوله لمنكوحته) أو معتدته (إن ذهبت فأنت طالق) (، أو الإضافة إليه) أي الملك الحقيقي عاما أو خاصا، كإن ملكت عبدا أو إن ملكتك لمعين فكذا أو الحكمي كذلك (كإن) نكحت امرأة أو إن (نكحتك فأنت طالق) (3/244)۔
وفیه ایضاً: (فإن اختلفا في وجود الشرط) أي ثبوته ليعم العدمي (فالقول له مع اليمين) لإنكاره الطلاق، ومفاده أنه لو علق طلاقها بعدم وصول نفقتها أياما فادعى الوصول وأنكرت أن القول له وبه (الی قوله ) إلا إذا برهنت) فإن البينة تقبل على الشرط(3/257)
وفی ردالمحتار: تحت (قوله في وجود الشرط) أي أصلا أو تحققا قوله فالقول له) أي إذا لم يعلم وجوده إلا منها ففيه القول لها في حق نفسها.الخ (3/356)