تین طلاقِ معلّق سے بچنے کا طریقہ

میری بیوی ناراض ہو کر چلی گئی تھی اور میں نے لڑتے ہوئے کچھ گالیاں دیدیں تھیں اس کو ، اور قسم لیتے ہوئے یہ بول دیا کہ اگر دوبارہ گالی دوں تو تم کوتین طلاق ہوں , میں اس پر پریشان ہوں کہ کیا انسان ہوں اور بہت خیال بھی رکھتا ہوں کہ ایسانہ ہو , پر اس بات سے پریشان بھی رہتا ہوں، کیا اس بات کی واپسی کی گنجائش ہے ؟ اس پر رہنمائی کر دیں۔

الجوابُ حامِدا ًو مُصلیِّا ً

سائل نے جب سوال میں مذکور الفاظ ادا کیے تو اس کی وجہ سے تعلیقِ طلاق منعقد ہو گئی، لہذا سائل اگر اپنی بیوی کو گالی دیگا تو اس سے اس کی بیوی پر تینوں طلاقیں واقع ہو کر حرمتِ مغلظہ ثابت ہو جائیگی اور حلالۂ شرعیہ کے بغیر دوبارہ رجوع بھی نہ ہو سکے گا، جبکہ عورت ایامِ عدت کے بعد اپنی مرضی سے کسی دوسری جگہ نکاح کرنے میں بھی آزاد ہو گی۔ البتہ اگر سائل یہ چاہتا ہو کہ کہیں گالی دیدینے سے اس کی بیوی پر معلق تینوں طلاقیں واقع نہ ہوں تو اس کیلئے یہ تدبیر اختیار کی جاسکتی ہے کہ سائل اپنی بیوی کو ایک طلاقِ بائن دیکر اپنی زوجیت سے الگ کر دے اور اس کی عدت ختم ہونے تک وہ ہر گز اسے گالی نہ دے ، پھر جب بیوی کی عدت ختم ہو جائے تو اسے گالی دے ( اور اس کے ساتھ تو به داستغفار اور آئندہ کیلئے بیوی یا کسی اور کو گالی دینے سے مکمل اجتناب کرے)، اس وقت چونکہ اس کی بیوی اس کے نکاح میں نہیں ہو گی، اس لئے اب اس کے گالی دینے کی وجہ سے اس پر کوئی طلاق واقع نہ ہوگی اور اس کی قسم بھی پوری ہو جائیگی، چنانچہ اس کے بعد دوبارہ گواہوں کی موجودگی میں نئے حق میر کے تقرر کے ساتھ باہم عقدِ نکاح کر لیں، اس کے بعد سائل کے اسے گالی دینے سے اس پر مزید کوئی طلاق واقع نہ ہوگی۔

مأخَذُ الفَتوی

کمافي الدر المختار: (وتنحل) اليمين (بعد) وجود (الشرط مطلقا لكن إن وجد في الملك طلقت وعتق وإلا لا، فحيلة من علق الثلاث بدخول الدار أن يطلقها واحدة ثم بعد العدةتدخلها فتنحل اليمين فينكحها الخ. (355/3)۔