"اگر تم نے جلدی کال ریسیو نہیں کی تو تمہیں طلاق " کہنے کا حکم

مفتی صاحب میرا ایک دوست ہے اس نے اپنے بیوی کو مندرجہ ذیل الفاظ بولے ہیں " کہ میں آپ کو طلاق کرتا ہوں اگر آپ نے آئندہ موبائل کو جلدی اٹنڈ نہ کیا " ابھی اس کے بعد اس نے کال نہیں کیا ہے، لیکن وہ پشیمان ہے، کہ میں اپنے الفاظ واپس لے لوں، کیونکہ اس نے تو گھر کو کال کرنا ہے لیکن ڈرتا ہے، کہ اگر اس نے جلدی اٹنڈ نہیں کیا، تو اسے طلاق نہ ہو جائے ؟ مہربانی کر کے رہنمائی فرمائیں

الجوابُ حامِدا ًو مُصلیِّا ً

سائل کے دوست کے مذکور جملہ "میں آپ کو طلاق کرتا ہوں اگر آپ نے آئندہ موبائل کو جلدی اٹینڈ نہ کیا " کہنے سے سائل کے دوست کی بیوی پر ایک طلاق معلق ہو گئی ہے ، اب اگر سائل کے دوست کی بیوی نے اپنے شوہر کی کال جلدی اٹینڈ نہ کی تو اس پر ایک طلاق رجعی واقع ہو جائے گی، جس کا حکم یہ کہ اس کے بعد سائل کا دوست اگر چاہے تو عدت کے اندر اپنی بیوی سےرجوع کر سکتا ہے ، جس کا طریقہ یہ ہے کہ یا تو زبان سے کہہ دے کہ مثلاً میں نے رجوع کر لیا وغیرہ یا عملاً میاں بیوی والے تعلقات قائم کرے یا شہوت کے ساتھ بیوی کو چھولے تو اس سے بھی رجوع ہو جائے گا، اگر عدت کے دوران رجوع نہیں کیا تو عدت گزرنے کے بعد دوبارہ ایک ساتھ رہنے کیلئے تجدیدِ نکاح لازم ہو گا، جبکہ عورت کو دوسری جگہ شادی کرنے کا اختیار ہو گا ، تاہم رجوع یا دوبارہ نکاح کی صورت میں مذکور شخص کو آئندہ فقط دو طلاقوں کا اختیار رہے گا، جب کبھی وہ دو طلاقیں بھی دیدے گا تو سائل کی بیوی اس پر حرمتِ مغلظہ کے ساتھ حرام ہو جائے گی۔

مأخَذُ الفَتوی

كما في تنویرالأبصار: (شرطه الملك) (كقوله لمنكوحته) (إن ذهبت فأنت طالق) ( أو الإضافة إليه) الخ3/344)
وفی الدرالمختار: (وتنحل) اليمين (بعد) وجود (الشرط مطلقا) لكن إن وجد في الملك طلقت وعتق وإلا لا الخ(3/355)