رمضان کے واسطے داڑھی چھوڑنے والے شخص کے پیچھے تراویح پڑھنےکا حکم

کیا فرماتے ہیں علمائے کرام اس مسئلہ کے بارے میں کہ، ایک شخص داڑھی کترواتا ہے اور چھوٹی کرتا ہے، جب کہ وہ حافظِ قرآن ہے، اب اس کا کہنا ہے کہ رمضان تک بالکل نہیں کٹواؤں گا، اگر وہ رمضان تک داڑھی چھوٹی نہ کرائے، تو خاصی بڑی ہوجائے گی، تو کیا اس کے پیچھے تراویح پڑھنا جائز ہے یا نہیں؟
نوٹ: اس شخص کے بارے میں رمضان کے بعد داڑھی نہ کتروانے کی ضمانت نہیں دی جاسکتی۔

الجوابُ حامِدا ًو مُصلیِّا ً

صورتِ مسئولہ میں مذکور شخص اگر واقعۃً رمضان المبارک تک داڑھی نہ کٹوائے، اور اپنے اس فعلِ قبیح سے توبہ واستغفار بھی کرلے، اور آئندہ کے لئے بھی اس فعل سے احتراز کرے، تو ایسے شخص کی اقتداء میں فرض نماز اور تراویح دونوں جائز اور درست ہیں۔
اور اگر وہ شخص اس فعل سے باز نہ آئے، اور آئندہ بھی اس فعل کا مرتکب رہے، جیسا کہ سوال میں مذکور اس کے کلام ’’رمضان تک بالکل نہیں کٹواؤں گا‘‘ سے بھی معلوم ہوتا ہے کہ، اس کا داڑھی چھوڑنا فقط رمضان کی خاطر ہے، مستقل داڑھی رکھنے کا ارادہ نہیں، تو ایسی صورت میں شخصِ مذکور کے بجائے کسی دوسرے متبع شریعت، متقی اور پرہیزگار کی اقتداء میں تراویح ادا کرنا زیادہ بہتر اور افضل ہے۔

مأخَذُ الفَتوی

ففی الشامیة: واما الفاسق فقد عللوا کراہة تقدیمه بانه لا یہتم لأمر دینه، وبأن فی تقدیمه للامامة تعظیمه، وقد وجب علیہم إھانته شرعًا الخ (560/1)…… واﷲ اعلم!