معلق طلاق کی ایک صورت کا حکم

محترم جناب مفتی صاحب السلام علیکم
میری شادی دسمبر ۲۰۰۴ میں ہوئی تھی اور میرے ۲ بیٹے ہیں , شادی کے ابتدائی سالوں سے ہی مجھے میرے شوہر کے , دوسری لڑکیوں کے ساتھ افیئر پتہ چلتے رہے , میں بہت ناراضگی کا اظہار کرتی تھی اور کئی دفعہ ناراض ہو کر اپنی امی کے گھر بھی چلی جاتی تھی اور پھر معافی تلافی کر کے صلح ہو جاتی تھی , اسی اثناء میں میری ایک کنڈیشنل طلاق بھی ہوگئی تھی جب میرے شوہر نے مجھے کہا تھا کہ اگر تم اپنی امی کے گھر گئیں تو تم کو ایک طلاق ہوجاۓ گی اور میں چلی گئی تھی اپنی امی کے گھر , اور پہلی طلاق ہوگئی , ۲۰۱۵ میں میرے شوہر کی ابوظبہی میں ملازمت ہوگئی , چند سال قبل وہ پاکستان آۓ ہوئے تھے تو میں نے اپنے شوہر کے فون میں ایک لڑکی کے میسجز اور نازیبا تصویرات دیکھیں , مجھے بہت غصہ آیا اور میں نے اپنے شوہر سے طلاق کا مطالبہ کردیا , حسبِ عادت میرے شوہر کی طرف سے معافی تلافی شروع ہوگئی , اس بار میں نے ان سے کہا کہ مجھے کنڈیشنل طلاق دے دیں کہ اگر اب آپ کسی لڑکی کے ساتھ کوئی بھی تعلق رکھیں گے یا صرف میسجز بھی کریں گے تو مجھے طلاق ہوجاۓ گی , اور میری اس بات کو میرے شوہر نے مان لیا تھا اور زبان سے بھی الفاظ ادا کیے , اب صورتحال یہ ہے کہ میرے شوہر مجھ سے بہت ساری باتیں چھپاتے ہیں , میرے ساتھ ان کا رویہ بہت خراب رہتاہے اور میرا دل ان کی طرف سے بالکل ہٹ گیا ہےاور مجھے اس بات کا یقین ہے کہ میری دوسری اور تیسری طلاق بھی ہوگئی ہےاور اگر اس بات کو میں اپنے شوہر سے پوچھوں گی تو وہ فوراً جھوٹ بول دیں گے کہ ایسا کچھ بھی نہیں ہوا , لیکن میرا دل اس بات کی گواہی دے رہا ہے کہ میری طلاق باقی کی دو طلاقیں بھی ہوگئی ہیں , آپ سے التماس ہے کہ نیچے دیے گئے معملات میں میری رہنمائی فرمادیں۔
۱۔ اگر میرے شوہر کسی لڑکی سے تعلقات قائم کرتے ہیں ایک سے زیادہ مرتبہ تو مجھے کتنی بار طلاق قائم ہو گی؟
۲۔ میں اب ان کے ساتھ رہنا نہیں چاہتی , اس معاملہ میں مجھے طریقہ کار کی رہنمائی فرمادیں , کس طریقہ سے میں ان سے علیحدگی اختیار کرسکتی ہوں ؟جزاک اللہ

الجوابُ حامِدا ًو مُصلیِّا ً

سائلہ کے شوہر نے جب دوسری بار معلق طلاق کا جملہ کہا تو اس سے سائلہ پر دوسری معلق طلاق بھی منعقد ہوچکی تھی،اس کے بعد اگر شوہر نے کسی بھی لڑکی سے تعلق رکھا ہو تو اس سے سائلہ پر طلاق واقع ہوچکی ہے،تاہم اس سلسلے میں باضابطہ ثبوت یا شوہر کی تصدیق لازم ہے،سائلہ کو چاہئیے کہ اپنے شوہر کو کسی قریبی مستند دارالافتاء لے جاکر اور دونوں اپنا اپنا بیان دیتے ہوئے مسئلہ معلوم کرکے جو حکمِ شرعی ہو اس پر عمل کرے-