اگر میں نے فحش فلم دیکھی تو میری بیوی کو طلاق کہنے کا حکم

محترم مفتی صاحب! السلام علیکم و رحمۃ اللہ و برکاتہ! مسئلہ یہ ہے کہ شوہر نے خود اپنے آپ کو مشروط کرلیا ہے، جیسے کہ ”اگر میں نے کبھی بھی فحش فلم دیکھی تو میری بیوی کو طلاق“ اور تعداد کا کوئی قول نہیں کیا ہے، تو اگر خدانخواستہ وہ غلطی سے یا جان بوجھ کر اگر دیکھ لیتا ہے تو کیا طلاق واقع ہوگی؟ اس مسئلہ کا تفصیلی جواب مرحمت فرمائیں ، جزاکم اللہ خیرا ۔

الجوابُ حامِدا ًو مُصلیِّا ً

واضح ہوکہ فحش فلمیں دیکھنا ناجائز و حرام اور گناہ کبیرہ ہے ، لہٰذا اس سے بچنا ہر مسلمان پر لازم ہے ، چنانچہ صورتِ مسئولہ میں اگر شوہر نے فحش فلموں سے بچنے کےلئے مذکور الفاظ ” اگر میں نے کبھی بھی فحش فلم دیکھی تو میری بیوی کو طلاق “ کہہ دیے تو اس سے اس کی بیوی پر ایک طلاقِ رجعی معلق ہوچکی ہے ، لہٰذا شخصِ مذکور جب بھی فحش فلم دیکھے گا تو اس کی بیوی پر معلق ایک طلاق واقع ہو جائے گی ، اور شوہر کو دورانِ عدت رجوع کا حق حاصل ہوگا ، اگر دورانِ عدت زبانی طور پر کہہ دے کہ ”میں رجوع کرتا ہوں“ وغیرہ یا عملاً میاں بیوی والے تعلقات قائم کرلے تو اس سے بھی رجوع درست ہوجائے گا اور دونوں کا ایک ساتھ رہنا جائز ہوگا ، ورنہ دورانِ عدت رجوع نہ کرنے کی صورت میں عدت گزرنے پر دونوں کا نکاح ختم ہوجائے گا اور عورت دوسری جگہ نکاح کرنے میں بھی آزاد ہوگی ۔

مأخَذُ الفَتوی

قال اللہ تعالی: قل للمؤمنين يغضوا من أبصارهم ويحفظوا فروجهم ذلك أزكى لهم إن الله خبير بما يصنعون (النور:30)۔
کمافی الفتاوی الھندیۃ: وإذا أضافه إلى الشرط وقع عقيب الشرط اتفاقا مثل أن يقول لامرأته: إن دخلت الدار فأنت طالق اھ (ج1، صـــ 420، ط: ماجدیہ)۔
وفی الھدایۃ: الطلاق على ضربين صريح وكناية فالصريح: قوله: أنت طالق ومطلقة وطلقتك فهذا يقع به الطلاق الرجعي لأن هذه الألفاظ تستعمل في الطلاق ولا تستعمل في غيره فكان صريحا وأنه يعقب الرجعة بالنص اھ (ج2، صـــ61، ط: انعامیہ)۔
وفیھا ایضاً: وإذا طلق الرجل امرأته تطليقة رجعية أو تطليقتين فله أن يراجعها في عدتها رضيت بذلك أو لم ترض اھ (ج2، صـــ88، ط: انعامیہ)۔