”اگر وہاں گئی تو پھر ”گئی “ کہنے طلاق کا حکم

میں نے اپنی بیگم سے بہنوئی کے بارے میں کہا اگر کسی کی میت بھی پڑی ہو جہاں وہ بندہ ہو وہاں نہیں جانااگر وہاں گئی تو پھر ”گئی “دوسری دفعہ وہ گئی میرے ذہن میں چھوڑنے کا خیال آیا، اس کا جواب دیدیں، دوسرا یہ کہ بلڈنگ کاگیٹ ہے اور فلور الگ الگ ،اگر وہ مین گیٹ کے سامنے آجائے اس کا کیا حکم ہے؟ اگر جہاں وہ بندہ ہو بیگم وہاں چلی جائے پوچھ کے نہیں، اس کا کیا حکم ہے؟ تیسرا یہ کہ اگر راستے میں سامنے آجائے اس کا کیا حکم ہے؟ اگر کسی جگہ شادی ہال وغیرہ یا شاپنگ مال میں وہ موجود ہو ہمیں بعد میں پتہ چلے کہ وہ یہاں پر تھا اس کا کیا حکم ہے؟

الجوابُ حامِدا ًو مُصلیِّا ً

واضح ہو کہ طلاق کے واقع ہونے کے لیےتحریری یا زبانی طور پر شوہر کا ایسے الفاظ کا استعمال کرنا ضروری ہے، جو صراحۃً یا دلالۃً طلاق وجدائی کے معنی کو شامل ہوں،(جیسے طلاق ہے، حرام ہے، فارغ ہے،آزاد ہے وغیرہ )جبکہ لفظِ ”گئی“ ایسا کوئی لفظ نہیں، لہذا اس لفظ کو بولنے کے بعد اگرچہ سائل کے ذہن میں چھوڑنے کا تصور آگیا تھا، تب بھی اس سے کوئی تعلیق معلق نہیں ہوئی، اس لیے سائل کی بیوی کا اس کےبہنوئی کی موجودگی میں کسی جگہ جانے یا اس کا آمنا سامنا کرنے سے شرعاً کوئی طلاق واقع نہ ہوگی، تاہم اگر سائل کا بہنوئی اگر اس کی بیوی کا محارم میں سے نہ ہوتو سائل کی بیوی پر لازم ہے کہ وہ اس سے مکمل پردہ اختیار کرے، اور بلا وجہ اس کے سامنے نہ آئے۔

مأخَذُ الفَتوی

کما فی بدائع الصنائع: وأما بیان رکن الطلاق فرکن الطلاق ھو اللفظ الذی جعل دلالۃ علی معنی الطلاق الخ ( کتاب الطلاق، ج2، ص98،ط:سعید)۔
وفی الدر المختار: (رفع قید النکاح فی الحال) بالبائن (أو المآل) بالرجعی (بلفظ مخصوص) ھو ما اشتمل علی الطلاق الخ ( کتاب الطلاق، ج3، ص226،ط: سعید)۔
وفی الھندیۃ: أما تفسیرہ فھو رفع قید النکاح حالاً أو مآلاً بلفظ مخصوص کذا فی البحر الرائق، أما رکنہ فقولہ أنت طالق ونحوہ کذا فی الکافی الخ ( کتاب الطلاق، ج1، ص348، ط؛ ماجدیۃ)