"اگر عدالت یا تھانے گئی تو طلاق" کہنے کا حکم

میرے شوہر نے مجھے کہا اگر عدالت یا تھانے گئی تو تم کو مجھ سے طلاق ہے اس کے گھر والوں نے مجھے بہت تنگ کیا تھا وہ بھی ہمیشہ مجھے مارتے ہیں گھر سے نکال دیتے ہیں مجھے جان سے مارنے کی کوشش کی پھر بار بار مجھے کہتا ہے کہ جاو نا کیوں نہیں جاتی عدالت , پھر آخر میں مجبورہو کر گئی میں طلاق نہیں چاہتی ہوں، تو کیا اب مجھ پر طلاق واقع ہو گئی؟

الجوابُ حامِدا ًو مُصلیِّا ً

صورتِ مسئولہ میں سائلہ کے شوہر نے اگر مذکور الفاظ"اگر عدالت یا تھانے گئی تو تم کو مجھ سے طلاق ہے" فقط ایک بار کہے ہوں تو اس سے سائلہ پر ایک طلاقِ رجعی معلق ہو چکی تھی ،چنانچہ اس تعلیق کے بعداگر سائلہ عدالت یا تھانے گئی ہو تو اس سے سائلہ پر ایک طلاقِ رجعی واقع ہو چکی ہے ، جس کے بعد دوران عدت شوہر کو رجوع کرنے کا اختیار حاصل ہے،چنانچہ اگر شوہر قولاْ یا عملاْ رجوع کرلے تو دونوں کا نکاح حسبِ سابق بر قراررہے گا ، البتہ اگر شوہر نے دروانِ عدت رجوع نہیں کیا تو عدت گزرنے سے یہ طلاق , طلاقِ ِ بائن بن جائے گی ، اور اس سے دونوں میاں بیوی کا نکاح ختم ہو جائے گا جس کے بعد شوہر کو رجوع کرنے کا اختیار نہ ہوگا ، تاہم عدت گزرنے کے بعد بھی اگر میاں بیوی باہمی رضامندی سے دوبارہ ایک ساتھ رہنا چاہیں ،تو اسکے لئے باضابطہ گواہوں کی موجودگی میں نئے حق مہر کے تقرر کے ساتھ باقاعدہ ایجاب وقبول کرکےدوبارہ نکاح کرنا لازم ہوگا ، مگر بہر دو صورت آئندہ کے لئے شوہر کو فقط دو طلاقوں کا اختیار ہوگا ، اس لئے آئندہ طلاق کےمعاملہ میں احتیاط سے کام لینا چاہئیے۔

مأخَذُ الفَتوی

کما فی التاترخانیۃ:اذا قال لامراتہ انت طالق لو دخلت الدار لم تطلق حتی تدخل الدار الخ(ج 2 ص 61)۔
وفی الھدایۃ: الطلاق على ضربين صريح وكناية فالصريح قوله أنت طالق ومطلقة وطلقتك فهذا يقع به الطلاق الرجعي الخ(باب ایقاع الطلاق،ج 2،ص 61،ط: انعامیہ)۔