کیمیکل ولواں کا طے شدہ معیار کے مطابق ٹیسٹ کے لئے دیے گئے کیمیکل کا حکم

کیا فرماتے ہیں مفتیان ِکرام اس مسئلہ کے بارے میں کہ ایک کیمیکل بنانے والی فیکٹری میں کیمیکل فروخت کرنے کا طریقہ کار یہ ہے کہ خریدار کو کیمیکل فروخت کرنے سے پہلے ٹیسٹ کرنے کیلئے دی جاتی ہے، جس میں لیبارٹری ٹیسٹ کے لئے مطلوبہ مقدار تو مفت دی جاتی ہے ،اور اگر خریدار 5 سے 10 کلو بھی ٹیسٹ کے لئے مانگتا ہے ،تو بغیر پیسوں کے دے دی جاتی ہے، لیکن اگر خریدار کہتا ہے کہ مجھے کیمیکل کی زیادہ مقدار ٹیسٹ کرنے کے لئے چاہئیے، تو ان کو 120 کلو کا ڈرم اس معاہدے پر دیا جاتا ہے کہ اگر کیمیکل ٹیسٹ کرنے کے بعد نتیجہ آپ کے معیار کے مطابق نہ ہوا تو آپ سے کسی رقم کا مطالبہ نہیں کیا جائے گا، یہاں تک کہ مکمل مقدار ہی استعمال کیوں نہ ہو جائے، تاہم کیمیکل کی بقیہ مقدار واپس لوٹانا ضروری ہوگا،اور اگر کیمیکل آپ کے معیار کے مطابق ہوا تو دیے گئے 120 کلو کے پیسے اگلے آرڈر میں وصول کیے جائینگے۔
وضاحت : دیے گئے، 120 کلو کی قیمت طے نہیں ہوتی بلکہ معیار پر پورا اترنے کے بعد آئندہ کی جو بھی قیمت طے ہو جاتی ہے ،اسی کو بنیاد بناتے ہوئے 120 کلو کی قیمت لگائی جاتی ہے۔ سوال 1 : دیے گئے 120 کلو کے ڈرم کی اگر قیمت مقرر کرلی جائے، پہلے سے ہی ،تو کیا مذکورہ طریقہ درست ہوگا؟
سوال 2: فروخت کرنے والے اس بات پر راضی ہوں کہ اگر کیمیکل آپ کے معیار کے مطابق نہ ہوا تو ہم پیسے نہیں لینگے، کیا پہلے سے ایسا معاہدہ کرنا درست ہوگا؟
سوال 3 : اگر ایسا طریقہ اختیار کرنا درست نہیں تو متبادل حل تجویز فرمادیں۔
نوٹ: ہم 120 کلوکیمیکل شروع سے ہی ہدیہ دے دیں ایسا بھی نہیں چاہتے۔ جزاک اللہ!

الجوابُ حامِدا ًو مُصلیِّا ً

واضح ہو کہ عرف کے مطابق جتنی مقدار کیمیکل کی ٹیسٹ میں صرف ہوتی ہو ،اس کو منہا کرنے کے بعد بقیہ مقدار فروخت کرنے یا واپس لینے کا اختیار مالکان کو شرعاًحاصل ہے، اس لئے اگر کیمیکل گاہک کے معیار کے مطابق ہو تو پہلے سے طے شدہ قیمت یا بعد کی طے کردہ قیمت پر فروخت کرنا بھی درست ہے۔ تاہم اگر کیمیکل معیار کے مطابق نہ ہو تو بقیہ مقدار واپس کر نا بھی گاہک پر لازم ہو گی۔

مأخَذُ الفَتوی

ففى حاشية ابن عابدين: (قوله: ثلاثة أيام) لكن إن اشترى شيئا مما يتسارع إليه الفساد، ففي القياس لا يجبر المشتري على شيء، (إلی قوله) اعلم أن الخيار في العقود كلها لا يجوز أكثر من ثلاثة أيام إلا في الكفالة في قول الإمام. (4/ 568)
وفي الدر المختار: (وتتم) الهبة (بالقبض) الكامل اھ (5/ 690)۔