میزان بینک کے ذریعہ گاڑی لیزنگ کرانے کا حکم

کیا فرماتے ہیں علماءِ دین مسئلۂ ذیل کے بارے میں کہ میں گاڑیوں کا کاروبار کرتا ہوں، شو روم میں ہمارے پاس بہت سے لوگ لیزنگ پر گاڑیاں خریدنے کے لئے آتے ہیں۔ لیکن سود کی وجہ سے اس کام سے اپنے کو بچانے کی کوشش کرتے ہیں ۔ لیکن اب میزان بینک کا سلسلہ چل رہا ہے۔ اور اس بارے میں سننے میں آ رہا ہے کہ غیر سودی ہے، لیکن بظاہر صورت وہ ہی نظر آئی جو دوسری لیزنگ کمپنیاں کرتی ہیں۔ مثلاً انشورنس, قسطوں کے لیٹ ہونے پر جرمانہ اور بظاہر یہ ہی وہ قباحتیں ہیں جن کی شریعت اجازت نہیں دیتی ۔ یا سود کے حکم میں آتی ہیں۔لیکن شریعہ بورڈ کی منظوری کی وجہ سے جب اس کے لئے کام کرنے کا ارادہ کرتے ہیں تو بعض شرکاء یہ کہتے ہیں کہ اس میں اور دوسری لیزنگ کمپنیوں میں کیا فرق ہے۔ اور شکوک شبہات پیدا ہوتے ہیں۔ برائے مہربانی تسلی بخش اور شافی جواب چاہیئے۔بالخصوصں مندرجہ ذیل چیزوں میں: ۱۔ انشورنس، ۲۔ جرمانہ، چاہے رفاہی کاموں میں استعمال ہو، لیکن ہے تو جرمانہ ہی جو سود کی شکل ہے۔ ۳۔ دوسری لیزنگ کمپنیوں میں اور اس میں کیا فرق ہے؟ ۴۔ ہمارے لئے میزان بینک سے کام کرنا جائز ہے؟

الجوابُ حامِدا ًو مُصلیِّا ً

محترم ا’’لمیزان بینک‘‘ کے ذریعہ لیزنگ کرانے اور کسی دوسری کمپنی کے ذریعہ لیزنگ کرانے میں بنیادی فرق یہ ہے کہ "المیزان" کی انتظامیہ اپنے کاروباری معاملات کو شریعہ بورڈ اور محقق علماء کرام سے پوچھ کر اور پھر اسے شریعت کے موافق کرنے کی پوری کوشش کرتے ہیں۔ جبکہ دوسرے ادارے ایسا نہیں کرتے ہیں۔پھر المیزان بینک بنیادی طور پر لیزنگ یعنی کرایہ پر گاڑی مہیا کرتا ہے اور اس کے لئے جو طریقہ کار ہے وہ بلاشبہ جائز اور درست ہے. اس میں شرعاً کوئی قباحت نہیں، البتہ بلاوجہ قسطوں کی ممکنہ تاخیر کے تدارک کی غرض سے مستاجر کے ذمہ دین کا ایک مخصوص حصہ بطورِ صدقہ یا چندہ رفاہی فنڈ میں جمع کرانے کو لازم کیا جاتا ہے جو شرعاً جرمانہ نہیں، اور بوقتِ مجبوری اسے اختیار کیا گیا ہے اورامام مالک ۔رحمہ اللہ۔کے ہاں اس گنجا ئش کی تصریح بھی ہے۔ گاڑی کی انشورنس اگرچہ جائز نہیں مگر یہ بینک کا ذاتی معاملہ ہے۔ اس معاملہ میں لیزنگ لینے والے کی کوئی مداخلت نہیں ہوتی۔ اس لئے بینک کے معاملہ کی وجہ سے یہ گناہ بھی نہیں ہوگا۔ لہذا " المیزان" سے لیزنگ کا معاملہ کرنے میں شرعاً قباحت نہیں بلا شبہ کر سکتے ہیں۔