امانت گم ہونے کی صورت میں ضمان کا حکم

السلام علیکم ورحمتہ اللہ وبرکاتہ ،مفتی صاحب!

میری بیوی کے پاس میری والدہ اور 3 بہنوں نے سونا رکھوایا تھا کہ یہ اپنے پاس رکھ لو. میری بیوی نے بغیر دیکھے کے کس نے کیا دیا ہے جیسے دیا تھا ویسے ہی اپنے سونے کے سیٹ کے ساتھ رکھ لیا ،نہ اسے کھولا اور نہ دیکھا کہ کس نے کیا کیا رکھنے کو دیا ہے. سونے کو رکھے ہوئے 8 یا 10 سال ہوگئے ہوں گے. بیچ میں والدہ مرحومہ نے تو اپنا سونا لے لیا تھا اور بڑی بہن نے اپنے دیئے ہوئے سونے میں سے کچھ سونا بیچنے کے لیے نکال لیا تھا اور پھر تھیلی باندھ کر دے دیا تھا. جہاں پر میری بیوی کا زیور ہے ،وہیں پر سب کے زیور تھے. اس میں سے چھوٹی بہن کے سونے کا سیٹ اور بڑی بہن کی انگوٹھی "چوری" ہوگئی ہے ،جبکہ ایک بہن کا سیٹ اور بیوی کا سیٹ وہی پر ہی موجود ہے. اب بڑی بہن اپنی انگوٹھی اور. چھوٹی بہن اپنے سیٹ کا مطالبہ کر رہی ہیں. جبکہ لاکٹ بہت حفاظت سے رکھے ہوئے تھے. شرعی حکم سے رہنمائی فرمائیں

جزاکم اللہ
محمد اکبر

الجوابُ حامِدا ًو مُصلیِّا ً

صورت مسؤلہ میں سائل کی بیوی کے پاس مذکور سونا بطور أمانت تھا ،اور أمانت کا ضابطہ یہ ہے کہ وہ اگر امین کے پاس اس کی غفلت کے بغیر ہلاک ہوجائے تو اس پر ضمان لازم نہیں ہوتا ،لہذا سائل کی بیوی نے اگر اپنی طرف سے مذکور سونے کی مکمل حفاظت کا انتظام کیا ہو اور اس میں کوئی کوتاہی نہ برتی ہو ،تو اس صورت میں سونا گم ہونے کی وجہ سے سائل کی بیوی کے ذمے اس کا ضمان شرعا لازم نہ ہوگا ، اورنہ ہی سائل کی بہنوں کا اس سے متبادل کا مطالبہ کرنا شرعا درست ہے ۔

مأخَذُ الفَتوی

‌کما فی الھندیہ : وإذاکانت الوديعة ‌ذهبا أو فضة، فقال: قد جعلتها في الكم فضاعت، لا ضمان عليه، كذا في الملتقط، 'ج4،ص؛344،ط؛ماجدیہ،
و فی الھدایہ : قال: "‌الوديعة ‌أمانة في يد المودع إذا هلكت لم يضمنها" لقوله عليه الصلاة والسلام: "ليس على المستعير غير المغل ضمان ولا على المستودع غير المغل ضمان" ولأن بالناس حاجة إلى الاستيداع، فلو ضمناه يمتنع الناس عن قبول الودائع فتتعطل مصالحهم.الھدایہ،ج؛3،ص؛23،ط؛مکتبہ شرکت علمیہ ۔)
و فی البنایہ : ('إذا هلكت لم يضمنها) ش: لأن المودع متبرع والتبرع لا يوجب ضمان حق لو سرقت عنده، وإن لم يسرق معها ما له لم يضمن عند اکثر اھل العلم،ص؛106 ،ج؛10۔)