ایچ بی ایل کے ” آئی سیو “اکاؤنٹ میں انویسٹمنٹ کا حکم

السلام علیکم ورحمة الله وبركاته!میں آپ سے شرعی رہنمائی حاصل کرنا چاہتا ہوں: کیا HBL Islamic Bank کے iSave Account میں سرمایہ کاری کرنا جائز ہے؟کیا یہ اکاؤنٹ واقعی اسلامی اصولوں پر چلایا جا رہا ہے؟کیا اس کا نفع سود سے پاک ہوتا ہے ؟کیا اس کی نگرانی کسی معتبر شرعی بورڈ کے تحت ہو رہی ہے؟اور پاکستان میں کون کون سے بینک واقعی شرعی اصولوں کے مطابق کام کر رہے ہیں؟آپ کن اسلامی بینکوں میں سرمایہ کاری یا Saving Account کھلوانے کی اجازت دیتے ہیں؟اگر ممکن ہو تو ان بینکوں کے نام بتا دیجیے جن پر آپ کا یا کسی مستند شرعی ٹیم کا اعتماد ہے۔
براہِ کرم اس بارے میں تفصیلی شرعی رہنمائی فرما دیں تاکہ میں بلا خوف و خطر کسی اسلامی بینک میں اپنی رقم محفوظ رکھ سکوں اور اللہ تعالیٰ کے احکام کے مطابق عمل کر سکوں۔جزاکم اللہ خیراً

الجوابُ حامِدا ًو مُصلیِّا ً

HBL Bankکی وہ غیر سودی برانچز جو مستند مفتیانِ کرام پر مشتمل شریعہ بورڈ کی زیرِ نگرانی میں اپنے تمام مالی معاملات سر انجام دے رہی ہوں،اور ان کے معاملات عملاً بھی شرعی ضابطوں کے مطابق ہوں،تواس کےان غیر سودی برانچز میں saving account کھلوانے اور اس پر ماہانہ یا سالانہ منافع حاصل کرنے کی گنجائش ہے، جبکہ کسی بھی ادارے اور بینک کے معاملات کے جواز اور عدم جواز کا تعلق ان کے توسط سے کیے جانے والے معاملات کے عملی طریقۂ کار کے ساتھ ہوتا ہے،اس لئے کسی بھی بینک اور ادارے کے معاملات کے طریقۂ کار کا جائزہ لیے بغیر حکمِ شرعی بیان نہیں کیا جاسکتا،لہذا سائل جس بینک کے ساتھ کوئی معاملہ کرنا چاہتاہو تو اس کے ساتھ کیے جانے والے معاملہ کی مکمل نوعیت معلوم کرکے کسی مستند دارالافتاء سے اس کے موافق حکمِ شرعی معلوم کرسکتاہے۔