زمین خریدار کے نام کراتے وقت کی قیمت وصول کرنے کا حکم

مؤدبانہ گزارش ہے کہ میرے والد نے ایک شخص کو زمین بیچی تھی۔ وہ تقریباً چھ کینال کا رقبہ ہے۔ اس وقت 1986 میں اس نے وہ زمین ساٹھ ہزار روپے میں بیچی تھی۔ وہ زمین جن کو بیچی تھی، ابھی تک ان کے نام پر نہیں ہوئی۔ ابھی میرے والد بھی انتقال ہوگیا ہے، جس نے زمین بیچی تھی، اور جس نے خریدی تھی، اس کا بھی انتقال ہوگیا ہے۔ خریدنے والے کے بچے ، بیچنے والے کے بچوں سے بول رہے ہیں کہ یہ زمین ہمارے نام پہ کردو۔ گواہوں میں دو گواہ ابھی بھی زندہ ہیں۔ جس نے زمین بیچی تھی اس کے بچے اگر ان سے اضافی روپے لینا چاہیں تو کیا لے سکتے ہیں یا نہیں؟ کیونکہ زمین کی قیمت اس وقت 5400000 لاکھ روپے ہے۔
نوٹ: زمین پر مشتری کا قبضہ اسی وقتِ خرید سے ہے۔ لیکن کاغذات میں ابھی تک ہمارے والد کے نام پر ہے۔

الجوابُ حامِدا ًو مُصلیِّا ً

صورتِ مسئولہ میں سائل کے والد مرحوم نےجب مذکورہ زمین 1986ء میں ساٹھ ہزار روپے کے عوض فروخت کردی تھی، اور خریدار نے اسی وقت زمین پر قبضہ بھی حاصل کرلیا تھا،تو قبضہ ہو جانے کے بعد وہ زمین شرعاً مکمل طور پر مشتری کی ملکیت بن چکی تھی ، چاہے قانونی کاغذات میں ان کے نام منتقل نہ ہوئی ہو ،چنانچہ قانونی کاغذات میں اندراج کا نہ ہونا شرعاًملکیت پر اثرانداز نہیں ہوگا۔اس لیےمرحوم فروخت کنندہ کے ورثاء کے لئے اب اس زمین کی موجودہ قیمت کے اعتبار سے کوئی اضافی رقم لینا شرعاً جائز نہیں،جس سے بہرصورت احترازلازم ہے۔

مأخَذُ الفَتوی

کما فی شرح المجلۃ: البیع النافذ یفید الحکم فی الحال أی ثبوت الملک فی البدلین لکل منھما فی بدل، و ھذا ھو الحکم الأصلی (إلی قولہ) إذا کان البیع لازما نافذا فلیس لأحد المتبایعین الرجوع عنہ أی وإن لم یتفرق مجلس العقد إلخ۔ (الباب فی بیان أنواع البیع و أحکامہ، الفصل فی بیان أحکام أنواع البیوع، ج 2، ص 273، ط: رشیدیۃ)۔
وفی الدر المختار: و حکمہ ثبوت الملک إلخ۔
وفی الشامیۃ: تحت (قولہ و حکمہ ثبوت الملک) أی فی البدلین لکل منھما فی بدل، وھذا حکمہ الأصلی، والتابع وجوب تسلیم المبیع والثمن، ووجوب استبراء الجاریۃ علی المشتری، وملک الاستمتاع بھا، وثبوت الشفعۃ لو عقارا إلخ۔ (کتاب البیوع، ج 4، ص 506، ط: سعید)۔
وفی الھندیۃ: أما حکمہ فثبوت الملک فی المبیع وفی الثمن للبائع إذا کان البیع باتا وإن کان موقوفا فثبوت الملک فیھما عند الإجازۃ کذا فی محیط السرخسی إلخ۔ (کتاب البیوع، الباب فی تعریف البیع ورکنہ وشرطہ وحکمہ وأنواعہ، ج 3، ص 2، ط: دار الفکر )۔