سرجری کے ذریعہ ناک کے ٹیڑھے پن کو ختم کرنا

پچھلے سال مجھے ناک کی ہڈی ٹیڑھی ہونے اور سانس لینے میں مسئلہ ہونے کی وجہ سے ڈاکٹر کے مشورے پر سرجری کروانی پڑی۔ الحمدللہ سانس کا مسئلہ کافی بہتر ہو گیا، لیکن سرجری کے بعد میری ناک کی shape پہلے جیسی نہیں رہی، بلکہ کچھ ٹیڑھی اور نیچے کی طرف ہو گئی ہے۔ اب ڈاکٹر کا کہنا ہے کہ corrective surgery کے ذریعے ناک کو کافی حد تک پہلے جیسا، نارمل اور سیدھا کیا جا سکتا ہے۔ میرا مقصد صرف ناک کو اس کی نارمل حالت کے قریب لانا اور ٹیڑھا پن درست کروانا ہے، نہ کہ غیر ضروری خوبصورتی حاصل کرنا۔ کیا ایسی corrective surgery شرعاً جائز ہے؟

الجوابُ حامِدا ًو مُصلیِّا ً

اگر سائل کی ناک اس قدر ٹیڑھی اور نیچے کی جانب ہوگئی ہو، جو عام فطری خلقت و ہیئت کے خلاف ہو، جس کی وجہ سے وہ بدنما نظر آرہی ہو اور عرفا اسے معیوب سمجھا جاتا ہو، تو ایسی صورت میں سائل کے لیے ازالہ عیب کی غرض سے ناک کی سرجری کروانے کی شرعاً گنجائش ہے، بشر طیکہ مذکور سرجری میں کسی انسانی عضو کا استعمال نہ ہو۔

مأخَذُ الفَتوی

كما في تكملة فتح الملهم: والحاصل أن كل ما يفعل في جسم من زيادة أو نقص من أجل الزينة بما يجعل الزيادة أو النقصان مستمرا مع الجسم وبما يبدو منه أنه كان في أصل الخلقة هكذا فانه تلبيس وتغيير منهي عنه وأما ما تزینت به المرأة لزوجها من تحمیر الأیدی أو الشفاه أو العارضیین بما لا یلتبس بأصل الخلقة فإنه لیس داخلا فی النهی عند جمهور العلماء، وأما قطع الإصبع الزائدة ونحوها فإنه لیس تغییرا لخلق اللہ وإنه من قبیل إزالة عیب أو مرض ، فأجازه أكثر العلماء خلافا لبعضهم اھ (كتاب اللباس والزينة: مط: مكتبة دار العلوم كراتشي ج: 4 ص: 169)