السلام علیکم ورحمۃ اللہ وبرکاتہ، مفتی صاحب! والد صاحب نے زمین کا ایک حصہ قبرستان کے لئے وقف کیا تھا، ان کی وفات کو 48 سال ہو چکے ہیں، قبرستان میں بے شمار قبریں ہیں اور بن رہی ہیں، اب ایک آدمی اپنے گھر کے لئے سڑک کا راستہ مانگ رہا ہے ، جبکہ متبادل جگہ بھی ہے ۔کیا اس وقف شدہ جگہ سے راستہ دیا جا سکتا ہے؟ رہنمائی فرما کر شکریہ کا موقع دیں، نوازش ہو گی ۔
واضح ہوکہ عام حالات میں موقوفہ چیز کی بیع یا تغییر شرعاً جائز نہیں، جس سے اجتناب لازم ہے، لہذا صورت مسئولہ میں مذکور شخص کا ذاتی آمد ورفت کی خاطر وقف شدہ زمین سے گھر کے لیے سڑک کا راستہ مانگنا یا متولی کا سڑک دینے کے لیے زمین بیچنا یا بغیر عوض کے دینا شرعاً جائز نہیں جس سے احتراز لازم ہے۔
كما في الفتاوى الهندية: «وعندهما حبس العين على حكم ملك الله تعالى على وجه تعود منفعته إلى العباد فيلزم ولا يباع ولا يوهب ولا يورث كذا في الهداية وفي العيون واليتيمة إن الفتوى على قولهما كذا في شرح أبي المكارم للنقاية» (كتاب الوقف، الباب الأول في تعريفه وركنه، ج:2، ص:350، مطبع: المطبعة الكبرى الأميرية ببولاق)
وفيها أيضا: «ولا يجوز تغيير الوقف عن هيئته فلا يجعل الدار بستانا ولا الخان حماما ولا الرباط دكانا، إلا إذا جعل الواقف إلى الناظر ما يرى فيه مصلحة الوقف، كذا في السراج الوهاج.» (كتاب الوقف، الباب الرابع عشر في المتفرقات، ج:2، ص:490، مطبع: المطبعة الكبرى الأميرية ببولاق)