اسقاطِ حمل سے آنے والے خون کے دوران روزہ رکھنے کا حکم

السلام علیکم!
میری بیوی کا اسقاطِ حمل ہوا ہے، جس کی وجہ سے ان کو وقتا فوقتا خون آتا رہتا ہے ہلکا ہلکا، کیا وہ رمضان کے روزے رکھ سکتی ہے؟ اگر رمضان تک یہ چلتا رہے، اور نماز کا حکم بھی بتا دیں؟

الجوابُ حامِدا ًو مُصلیِّا ً

سائل کی بیوی کا حمل ضائع ہونے کے وقت اگر بچے کے کچھ اعضاء بنے ہوئے تھے تو ایسی صورت میں اسقاطِ حمل کا خون نفاس شمار ہو گا، جو اگر چالیس دن تک جاری رہا تو اس میں نماز ، روزہ رکھنا جائز نہ ہو گا، البتہ اگر چالیس دن سے پہلے خون بند ہو جائے تو پھر عورت پاک شمار ہو گی، جس کے بعد وہ غسل کر کے نماز ، روزہ وغیرہ ادا کر سکے گی، جبکہ بچہ ضائع ہونے کے وقت اگر بچے کے اعضاء بنے ہوئے نہیں تھے تو ایسی صورت میں اب جو خون آرہا ہے وہ اگر تین دن سے زیادہ عرصہ تک جاری رہے تو وہ حیض کا خون شمار ہو گا جس میں سائل کی بیوی اپنی سابقہ عادت کے مطابق نماز ، روزہ نہیں رکھے گی۔

مأخَذُ الفَتوی

كمافي الدر المختار: (وسقط) مثلث السين: أي مسقوط (ظهر بعض خلقه كيد أو رجل) أو أصبع أو ظفر أو شعر ولا يستبين خلقه إلا بعد مائة وعشرين يوما (ولد) حكما (فتصير) المرأة (به نفساء والأمة أم ولد ويحنث به) (الى قوله) فليس بشيء، والمرئي حيض إن دام ثلاثا وتقدمه طهر تام وإلا استحاضة اھ (1/ 302)۔
وفي الفتاوى الهندية: والسقط إن ظهر بعض خلقه من أصبع أو ظفر أو شعر ولد فتصير به نفساء هكذا في التبيين وإن لم يظهر شيء من خلقه فلا نفاس لها فإن أمكن جعل المرئي حيضا يجعل حيضا وإلا فهو استحاضة اھ(1/ 37)۔